काठमाडौं– नेपाल कम्युनिस्ट पार्टी उपत्यका ब्यूरोले रुकुम पश्चिम र जाजरकोटका भुकम्प प्रभावितका लागि ३२ लाख बराबरको राहत संकलन गरेको छ।
काठमाडौंको कपुरधारास्थित नेकपा उपत्यका ब्यूरो कार्यालयमा पत्रकार सम्मेलनको आयोजना गरि समग्र ब्यूरो अन्तर्गतका जिल्लाहरुबाट नगद १ लाख ३३ हजारसहित ३२ लाख बराबरको राहत संकलन गरिएको जानकारी दिएको हो।
बुधबार पार्टी कार्यालयमा संकलित राहत सार्वजनिक गर्न आयोजित पत्रकार सम्मेलनमा बोल्दै नेकपा उपत्यका ब्यूरो इन्चार्ज कृति सीले समग्र उपत्यका ब्यूरोबाट ३२ लाख बराबरको राहत संकलन गरिएको जानकारी दिए।
उनले भने, ‘शुक्रबार जाजरकोट केन्द्रबिन्दु बनाइ गएको विनाशकारी भूकम्पको क्षतिपश्चात् पार्टीको उपलब्ध स्थायी समिति सदस्य तथा केन्द्रीय सदस्यहरुको आपतकालीन संयुक्त बैठकको निर्णय अनुसार देशैभरका जिल्ला ब्यूरो पार्टीहरुलाई पीडितको राहत तथा उद्धार कार्यमा जुट्न निर्देशन थियो। त्यही अनुसार हाम्रो ब्यूरो पनि लागिपर्यो। पीडितहरुप्रति उपत्यकाका जनता, व्यापारीहरुले देखाएको सदासयता पार्टी कमिटीको अथाह मेहेनतले आज पीडितहरुको घाउमा थोरै भएनी मलाम लगाउन सफल भएका छौं।’
पार्टी केन्द्रको आफ्नो केन्द्रीय उत्पादनबाट भूकम्प प्रभावितहरुलाई खाद्यान्न र नगत दिने निर्णयसँगै आफूहरु पनि राहत संकलन कार्यमा जुटेको तर राज्यको कथित एकद्वार प्रणालीको उर्दीले राहत संकलनमा अवरोध भएको उनको भनाइ छ।
उनले भने, ‘प्रशासनको अवरोधका बावजुद पनि पLडितहरुका लागि यति मात्रामा राहत जम्मा गर्न सफल भयौं। राज्यले भनेको एकद्वार प्रणालीले राहत सामग्री वास्तविक पीडितसम्म नपुग्ने र पुगे पनि आफ्ना मान्छे मात्र पोस्ने काम भएको गुनासोहरु सुनिएको छ।’
एकद्वार प्रणालीले आफ्ना कर्मचारी तन्त्र र आफ़न्तहरुलाई पोस्ने मात्र काम हुने भ्रष्टाचार, अनियमितताको खतरा बढी उनले बताए। उनले आफ्नो ब्यूरोले संकलन गरेको सम्पूर्ण जिन्सी पार्टी महासचिवसमक्ष आजै हस्तान्तरण गर्ने र बाँकी नगत दैवी प्रकोप उद्धार कोषमा जम्मा गर्ने समेत जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
