धनगढी– धनगढी उपमहानगरपालिकाले फोहोरमैला व्यवस्थापनका लागि आफैंले कालोसूचीमा राखेका व्यक्तिलाई ठेक्का दिएको पाइएको छ।
फोहोर व्यवस्थापनका लागि गत वर्ष मनोमानी शुल्क असुलेको भन्दै कालोसूचीमा परेका व्यक्तिलाई उपमहानगरपालिकाले पुनः फोहोर व्यवस्थापनको जिम्मा दिएको हो।
गतवर्ष धनगढी उपमहानगरपालिकाले निजी कम्पनी मातृभुमी संरक्षण प्रालिलाई फोहोर व्यवस्थापनको जिम्मेवारी दिएको थियो। यस वर्ष नन्दादेवी सेवा केन्द्रलाई ठेक्का दिएको छ। मातृभूमि र नन्दादेवीका नाममा हस्तबहादुर शाहलाई फोहोर व्यवस्थापनको जिम्मा दिएको छ।
उपमहानगरपालिकाले गत वैशाखमा फोहोर व्यवस्थापनका नाममा घर तथा होटलबाट मनोमानी शुल्क असुल गरेको भन्दै ६ लाख जरिवाना असुल गर्ने निर्णय गरेको थियो।
ठेक्का रद्द भएपछि उपमहानगरपालिकालाई विपक्षी बनाउँदै शाहले जिल्ला अदालत कैलालीमा उजुरी दर्ता गराएका थिए। अहिले तिनै व्यक्तिलाई पुनः ठेक्का दिएपछि फोहोर व्यवस्थापनका लागि भन्दै मनोमानी रकम असुल गरिरहेको गुनासो छ।
धनगढी उपमहानगरपालिकाले जथाभावी रकम असुल गरेको भन्दै बुधबारमात्र स्पष्टीकरण पत्र पठाएको छ। पत्रमा भनिएको छ, ‘तपाईंले पट्टा पुर्जीमा तोकिएको शुल्कको दरभन्दा बढी दरले फोहोरमैला व्यवस्थापन शुल्क संकलन गरेको भनी विभिन्न सञ्चार माध्यम र व्यक्तिहरुबाट पटक–पटक गुनासो प्राप्त हुन आएकोले तपाईंले सम्झौतामा उल्लेख भएको दररेटभन्दा फरक दररेटमा फोहोरमैला व्यवस्थापन शुल्क संकलन गरे/नगरेको स्पष्ट जवाफसहित व्यवस्थापन शूल्क संकलन गरेको नगदी रसिद दुई दिनभित्र कार्यालयमा पेस गर्न निर्देशन दिइन्छ।’
उपमहानगरपालिकाको आर्थिक ऐन २०८० मा ‘प्रति भान्सा–परिवार बजार क्षेत्र मासिक एक सय रुपैयाँ, आंशिक बजार मासिक ९०, आवासीय क्षेत्र ७० रुपैयाँ मासिक र विद्यार्थीलाई ५० प्रतिशत छुट रहने’ व्यवस्था छ। कम्पनीले सो ऐनविपरीत दुई सयदेखि चार सयसम्म रकम असुल गरेको स्थानीयहरुको गुनासो रहेको छ।
कोठा भाडामा लिई बस्ने विद्यार्थीहरुसमेत फोहोर संकलन शुल्क तिर्न बाध्य छन्। घरबेटीसँग प्रतिमहिना तीन सयदेखि पाँच सय रुपैयाँ कर असुल्ने उपमहानगरपालिकाले त्यो घरका हरेक कोठामा डेरामा बस्नेहरुबाट प्रत्येक महिना सय रुपैयाँ फोहोर संकलन कर उठाउने गरेको डेरामा बस्ने विद्यार्थीहरुको गुनासो छ।
कच्ची छाप्रोमा रहेका खाना पाइने होटलहरुबाट तीन सय ५० देखि पक्की घरका खाना पाइने होटलहरुबाट एक हजार रुपैयाँ र ठूला होटलहरुबाट मासिक पाँच हजार रुपैयाँभन्दा बढी फोहोर संकलनका नाममा धनगढी उपमहानगरपालिकाले शुल्क उठाउने गरेको पाइएको छ।
अस्पतालहरुबाट आठ हजार रुपैयाँसम्म फोहोर संकलनका नाममा शुल्क लिइरहेको उपमहानगरपालिकाले अस्पतालबाट सड्ने र नसड्ने सामान मात्र लिन्छ। सिसा, प्लास्टिकको बोत्तल लिँदैन। ‘अस्पतालभित्र जे फोहोर हुन्छ, त्यो लिँदैन,’ एक अस्पताल सञ्चालकले भने, ‘तर नगरपालिकाका कर्मचारीहरु फोहोर संकलनको शुल्क भने महिना नसकिँदै लिन आइपुग्छन्।’
फोहोर संकलनका नाममा शुल्क लिने उपमहानगरपालिकाले मेडिकल पसलमा हुने फोहोर (सिसा र सिरिञ्ज) नउठाउने गरेको मेडिकल पसलहरुको गुनासो छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764941657.png)
-1764939100.png)
-1764935841.png)
-1764934790.png)
-1764933611.png)
-1764146706.png)
-1763721444.png)
