काठमाडौं– कोशी प्रदेश सभामा अहिले मुख्यमन्त्री केदार कार्कीले पेस गरेको विश्वासको मत माग्नेसम्बन्धी प्रस्तावमाथि छलफल चलिरहेको छ। शनिबार मुख्यमन्त्री नियुक्त भएका कार्कीले १ हप्ताभित्रै प्रदेश सभाबाट विश्वासको मत लिनका लागि प्रस्ताव पेस गरेका छन्।
उनको प्रस्तावमाथि छलफलमा भाग लिँदै एकीकृत समाजवादीले भने मध्यावधि निर्वाचनमा गएर ताजा जनादेश लिनुपर्ने बताएको छ। एकीकृत समाजवादी प्रदेश संसदीय दलका नेता राजेन्द्र राईले प्रदेशमा मध्यावधि निर्वाचनाट ताजा जनादेश लिनुपर्ने प्रस्ताव अघि सारेका हुन्।
प्रदेशसभाको आत्मा कोमामा पुगिसकेको भन्दै उनले प्रदेशसभा विघटन भएर, मध्यावधिमा गएर फ्रेस जनमत ल्याएर यसलाई पुनर्जीवित गर्नुपर्ने बताए। अध्यादेशबाट बजेट ल्याउनु, प्रदेशको नामकरण गर्दा संशोधन दर्ता गर्ने समय पनि नदिइ हतारमा पारित गर्नु यसको उदाहरण भएको बताए।
यद्यपि राईले आफ्नो पार्टीले पनि मुख्यमन्त्री कार्कीलाई विश्वासको मत दिने बताए। गठबन्धनले विश्वासको मत दिने निर्णय गरेको भन्दै त्यसको मान राख्नका लागि आफ्नो पार्टीले मत दिने राईले उल्लेख गरे।
राईले सिद्धान्ततः गठबन्धनले कार्कीलाई विश्वासको मत दिन नहुने बताए। ‘किनभने गठबन्धनले उहाँलाई मुख्यमन्त्री नबनाउनका लागि, अर्कै मुख्यमन्त्री बनाउनका लागि दाबी पेश गरेको हो। त्यसकारण उहाँलाई विश्वासको मत दिन नहुने हो,’ विश्वासको मत लिने प्रस्तावमाथिको छलफलमा भाग लिँदै उनले भने।
मुख्यमन्त्री कार्कीले सिर्जना गरेको गठबन्धन अस्वाभाविक खालको भएको र गठबन्धनलाई धोका दिएर कार्कीको सरकार बनेको राईको कटाक्ष थियो।
जनताले पनि तत्काल प्रदेशलाई मध्यावधिमा जानबाट जोगाउनुपर्छ भने चाहना व्यक्त गरिरहेको र त्यसलाई कदर गर्दै गठबन्धनले नै कार्कीलाई गठबन्धनकै मुख्यमन्त्री बनाउने भन्ने निर्णय गरेको उनले बताए। ‘त्यसको मान राख्दै र भोलिका दिनमा उहाँले त्यही भूमिका खेल्नुहुन्छ भन्ने शंकाको सुविधा दिँदै, सुविधा लिँदै हामी गठबन्धनले समर्थन गर्छौँ। र भोलि शंकाको सुविधाअनुसार गठबन्धनको मुख्यमन्त्रीका रुपमा काम गर्नुहुन्छ भन्ने विश्वास छ,’ उनले भने।
आफूहरूले गठबन्धनको मुख्यमन्त्री बनाउन नसकेको अवस्थामा अहिले एमालेले नै गठबन्धनको मुख्यमन्त्री बनाइदिएको भन्दै उनले धन्यवाद प्रकट गरे। उनले नेकपा एकीकृत सरकारमा सहभागिताको संकेत पनि गरे। भने, ‘सरकारलाई विश्वासको मत दिने, चलाएर थामेर लैजाने, मिलेर काम गर्ने, हामी पनि सरकारमा सहभागी हुने। त्यसैले यो सरकारलाई सफलताको शुभकामना र बधाई दिन चाहन्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
