धनगढी– नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डले विश्वभरीका नेपालीहरुले समाजवादी मोर्चाप्रति आशा र भरोसा गरेको दाबी गरेका छन्।
सोमबार सुदूरपश्चिमको धनगढीमा आयोजित समाजवादी मोर्चाको कार्यक्रममा बोल्दै प्रचण्डले राजनीतिलाई सुदृढ गर्ने जिम्मेवारी मोर्चामा आवद्ध सबै दलहरुको रहेको उल्लेख गरे।
उनले समाजवादी मोर्चाबीच सम्झदारी र सहकार्य नहुने भए अहिले परिवर्तन सम्भव नरहेको बताए। उनले एकताबद्ध भएको कम्युनिष्ट व्यक्तिको दम्भका कारण अदालतले विभाजनतर्फ लगेको बताउँदै भने, ‘अहिले एमालेको नेतृत्व जसले गरेको छ। उहाँ रियल एमाले होइन। उहाँ संघीयतावादी, गणतन्त्रवादी होइन।’
युद्धकालीन अवस्था स्मरण गर्दै उनले अहिलेको नेतृत्व तत्कालीन अवस्थामा भएको भए अहिलेको परिवर्तन सम्भव हुन नसक्ने दाबीसमेत गरे। अहिले पनि जनताको उपलब्धि गुम्ने खतरा रहेको उनको भनाइ थियो।
‘परिवर्तन उल्टाउन चाहने शक्तिलाई परास्त गर्छौं। त्यसको लागि हामी एक ठाउँमा आउनुपर्छ,’ उनले भने, ‘संविधान मिचेर संसद् विघटन गर्ने र प्रतिगमनतर्फ लैजाने डरलाग्दो प्रयास भएकै थियो। हामीले नै त्यो षड्यन्त्रलाई परास्त गरेका थियौं अदालतले पनि जनताको कुरा सुनेर संसद् पुनर्स्थापना गर्यो। अहिले पनि त्यो कोसिस भइरहेको छ।’
उनले सरकारले भ्रष्टाचारविरुद्ध अभियान र सुशासनको पक्षमा ठूलो काम गरेको दाबी गर्दै ‘मिटर ब्याजलाई प्राथमिकतामा राखेर काम गर्दा हामी सफल भयौं। त्यसपछि ललिता निवास, भुटानी शरणार्थी र सुन प्रकरणमा दोषी भएकाहरुमाथि अनुसन्धान भइरहेको छ।’
प्रधानमन्त्री प्रचण्डले सरकारले अरू पनि केही फाइलहरू छिट्टै खोल्ने बताए।
यस्तै नेकपा एकीकृत समाजवादीका अध्यक्ष तथा पूर्व प्रधानमन्त्री माधवकुमार नेपालले समाजवादी मोर्चा तयार गर्दा केही पार्टी हतोत्साहित भएको बताए। उनले चार दल एक ठाउँमा आएर समाजवादी मोर्चा तयार गर्दा देशमा तरंग सृजना भएको प्रतिक्रिया दिए।
वामपन्थी शक्तिलाई एक ठाउँमा ल्याउने उद्देश्यले समाजवादी मोर्चा गठन भएको उनको भनाइ थियो। देशमा रोजगारी नभएर विदेश जानेहरूको संख्या बढिरहेकोप्रति चिन्ता व्यक्त गर्दै उनले सरकार यो विषयमा गम्भीर बन्नुपर्नेमा जोड दिए।
अध्यक्ष नेपालले गठबन्धन पाँच वर्षसम्म चल्ने बताउँदै समाजवादी मोर्चा गठनप्रति कांग्रेस रुष्ट नभएर खुशी रहेको दाबी गरे।
कार्यक्रममा जनता समाजवादी पार्टी (जसपा)का अध्यक्ष उपेन्द्र यादवले संघीय लोकतान्त्रिक गणतन्त्र खतरामा रहेको बताए। उनले विभिन्न कारणले अहिलेको उपलब्धि गुम्ने खतरामा पुगेको बताउँदै नेपालमा जातीय द्वन्द्व फैलाउने र धार्मिक द्वन्द्व निम्त्याउँदै संघीय लोकतान्त्रिक गणतन्त्रलाई समाप्त पर्ने खेल भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
