धनगढी– नेकपा एमाले सुदूरपश्चिम प्रदेश अधिवेशन अन्योलग्रस्त बनेको छ। सुरुमा दुई ध्रुवमा विभाजित बनेको पार्टी अध्यक्ष केपी शर्मा पक्षले उम्मेदवारी नै नदिएकाहरुको नाममा सहमति गरेको दाबी गरेपछि तनाव सिर्जना भएको छ।
सर्वसम्मत नेतृत्व चयन गर्ने भन्दै नेताहरु सक्रिय छन्। उम्मेदवारको अन्तिम नामावली मंगलबार नै सार्वजनिक गरिए पनि बुधबार १२ बजेसम्म निर्वाचनको तयारी गरिएको छैन। निर्वाचन कार्यक्रम संशोधन गर्दै आएको निर्वाचन समितिले साढे १२ बजेसम्म उम्मेदवारी फिर्ताका लागि समय थपेको छ।
यहीबीच अध्यक्ष ओलीनिकट नेताहरुले शीर्ष पाँच पदमा सहमति भएको भन्दै एउटा नामसूची मंगलबार रातिदेखि सार्वजनिक गरिरहेका छन्।
जहाँ अध्यक्षमा कृष्णप्रसाद जैशी, उपाध्यक्षमा कालीबहादुर शाही, सचिवमा रणबहादुर चन्द, उपसचिवमा नेपालु चौधरी र कलशा महरा रहेका छन्।
उम्मेवदवारी नै नदिएकाहरुको नाममा सहमति?
अध्यक्षको आकांक्षीमा जैशीका अतिरिक्त बचनबहादुर सिंह, कमल तिमिल्सिना र भरत साउद रहेका छन्। तीमध्ये ओली पक्षकै दामोदर भण्डारी समूहले उठाएका तिमिल्सिनालाई पछि हटाएको छ। तर, लेखराज भट्टको खेमाबाट अध्यक्षका प्रत्यासी बनेका सिंह र भीम रावल पक्षका साउदले उम्मेदवारी कायम रहेको बताइरहेका छन्। उनीहरुले अधिवेशन प्रतिनिधिहरुसँग भोट मागिरहेका छन्।
उपाध्यक्षमा हरिसिंह साउद, कालीबहादुर शाही, हजारी साउद, बलदेव रेग्मी र रणबहादुर महराले उम्मेदवारी दर्ता गराएका थिए। ओली पक्षकै भण्डारी समूहले अध्यक्ष कर्णबहादुर थापा समूहलाई छाडेर उपाध्यक्ष लिएको छ। थापा समूहका बलदेव रेग्मी र हजारी साउँदले उम्मेदवारी फिर्ता लिएका छन्।
एक जना सचिवका लागि रणबहादुर चन्द, राजेशकुमार खाती र रतनराज रेग्मी उम्मेदवार छन्। चन्दको नाममा सहमति गर्न ओली समूह राजी रहेको छ।
एक जना उपसचिव (महिला)का लागि भागरथी विष्ट तिमिल्सेना, कन्दकला राना र अर्चना गहतराजले उम्मेदवारी दिएका छन्। तर, ओली समूहले कलशा महरालाई सर्वसम्मत बनाउने चर्चा चलाएको छ।
एकजना उपसचिव (खुला)का लागि अशोककुमार चन्द, नरबहादुर विक, रामदत्त जोशी, हरदेव जोशी, पल्लवराज भट्ट र सुरेन्द्रबहादुर पालले उम्मेदवारी दिएका छन्। तर, नेपालु चौधरीको नाममा ओली पक्षका नेताहरुले सहमति जुटाएको बताइएको छ।
उम्मेदवारी नै नदिएकाहरुको नाममा सहमति खोजिएको विषयलाई लिएर भीम रावल पक्षले आपत्ति जनाइरहेको छ। रावल पक्षका एक नेताले कटाक्ष गर्दै भने, ‘सहमतिका नाममा सुदूरपश्चिममा बहुदलीय जनवादको नयाँ व्याख्या हुँदैछ।’
ओली पक्षले बहुमतको नाममा पेलेर लैजान खोजेपछि रावल पक्षले उम्मेदवारी कायम राखेर जाने रणनीति लिएको छ।
रावल पक्षबाट अध्यक्षका उम्मेदवार रहेका भरत साउद, सचिवका उम्मेदवार रतनराज रेग्मी र उपसचिवका उम्मेदवार नरबहादुर विकले विज्ञप्ति जारी गर्दै निर्वाचनबाटै नेतृत्व चयन गर्न माग गरेका छन्। उनीहरुले बाहिरबाट सहमति खोज्ने कुराको विरोध गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
