इजराइलको अप्रिय खबरले शोकमा सुदूरपश्चिम विश्वविद्यालय

समाचार

रासस सोमबार, असोज २२, २०८० १३:२८

भजनी– ‘अहिले यहाँ (इजरायलमा) कति बेला के हुन्छ, केही आत्तोपत्तो छैन। हामीहरु शनिबारदेखि बङ्करमा लुकेर ज्यान जोगाउन बाध्य छौँ। यहाँ सोचेजस्तो सहज केही पनि छैन। कतिबेला आकासमा कालो धुँवाको मुस्लो उठ्छ थाहै हुँदैन। निकै नै त्रसित माहोल छ। मिसाइल कतिबेला कताबाट आयो पत्तो पाइँदैन,’ इजारयलमा रहेका कैलालीको टीकापुरका निश्चल पाण्डेले पठाएको म्यासेज हो।

सुदूरपश्चिम विश्वविद्यालयको कृषि विज्ञान सङ्कायबाट ‘अर्न एण्ड लर्न कार्यक्रम’मार्फत् इजरायल पुगेका पाण्डेका अनुसार खतराको संकेत जनाउँदै बेला बेला साइरन बजिरहन्छ।

‘साइरनको त्यो ठूलो आवाजले सातो जान्छ। आकाशमा हेलिकोप्टर र फाइटर जेट निरन्तर उडिरहेका छन्। बङ्करमा पनि सोचें जस्तै सहज केही छैन्। न खाना न पानी अनि त्यो चिसो भूइँमा त्रासैत्रासमा बिताउनुको पीडाले नर्कमा भएको अनुभूति भएको छ। आजको रात निकै लामो हुने छ। पर्खाइ त्यो भोलि शुभ बिहानीको हुनेछ,’ पाण्डेले आफ्नो सन्देशमा भनेका छन्।

उनले सन्देश पठाएको केही समयपछि उक्त आक्रमणमा परी १० जना नेपाली विद्यार्थीले ज्यान गुमाएको समाचार आयो। सो घटनापछि सुदूरपश्चिम विश्वविद्यालय शोकमा परेको छ। ‘घटनाले विद्यार्थी हतोत्साहित बनेका छन्। शिक्षक भावविह्वल बन्नुभएको छ। क्याम्पसका सबै पठनपाठन बन्द भएका छन्। आन्तरिक परीक्षा स्थगित भएको छ,’ सुदूरपश्चिम विश्वविद्यालयअन्तर्गतको टिकापुर बहुमुखी क्याम्पसका उपप्राध्यापक प्रेम पाण्डेले भने, ‘हामीसँग बोल्ने शब्द बाँकी छैनन्। घटनाले हामीलाई विवश बनाएको छ।’ उक्त घटनाले विद्यार्थीको मनोबल कमजोर बन्ने स्थिति देखिएको उनले बताए।

विश्वविद्यालयका उपप्राध्यापक सरोज घिमिरेले विद्यार्थीको मृत्युले राज्यले ठूलो जनशक्ति गुमाएको बताए। उपप्राध्यापक घिमिरे भन्छन्, ‘आज दुःखद् घटना घट्यो। यस्तो अवस्थामा हामीसँग कुनै उत्तर छैन।’

उपप्राध्यापक गुरु अधिकारीले सुदूरपश्चिम विश्वविद्यालयबाट इजरायल पुगेका अन्य विद्यार्थी पनि जोखिममा रहेको बताए। जतिसक्दो चाँडो राज्यले घाइतेको उपचारमा र अन्यलाई नेपाल फर्कने वातावरण बनाउनुपर्ने अधिकारी बताउँछन्। ‘राज्यको भूमिका औपचारिकता मात्रै देखिएको छ। हाम्रा अन्य विद्यार्थी पनि जोखिममा छन्। उहाँहरुको समयमै उद्धार होस्,’ अधिकारीले भने, ‘आज विद्यार्थीका अभिभावक भावविह्वल अवस्थामा छन्। सिङ्गो क्याम्पस शोकमा छ। म आग्रह गर्छु, राज्य जिम्मेवार बनोस्।’

कृषि विज्ञान सङ्कायको दोस्रो वर्षमा अध्ययनरत सुन्दर विश्वकर्मा थापाले इजराइलमा विद्यार्थीको निधनले आशाको दियो निभेको बताए। पहिलो ब्याचका विद्यार्थी इजरायल जाँदा आफूले बोकेका सपनामा पूर्णविराम लागेको उनको भनाइ छ। ‘हामीभन्दा अघिल्लो ब्याचका विद्यार्थीहरु थप सिकाइका लागि इजरायल जानुभएपछि हामी पनि जानुपर्छ भन्ने लागेको थियो। अहिलेको घटनाले त्यो सपनामा पूर्णविराम लागेको छ,’ थापाले भने। त्रासमा रहेका सबै विद्यार्थीलाई नेपाल फिर्ताका लागि सरकारले चाँडो पहल गर्नुपर्ने उनको भनाइ छ।

विश्वविद्यालयबाट भदौ २६ गते इजरायल पुगेका निश्चल पाण्डेका बुबा उत्तम पाण्डेले आफ्नो छोरासहित सबै विद्यार्थीलाई नेपाल फिर्ताका लागि सरकारसँग आग्रह गरेका छन्। उनले छोरासँग सम्पर्क भइरहेको बताउँदै त्यहाँ रहेका विद्यार्थी निकै असुरक्षित भएको बताए। ‘बाहिरको वातावरण निकै असुरक्षित छ भनेर छोरासँग सम्पर्क भइरहेको छ। उहाँहरु अझै पनि बङ्करमा बसेर जीवन जोगाइराख्नु भएको छ,’ पाण्डेले भने, ‘उहाँहरुको कुराले सबै विद्यार्थी नेपाल फर्किन चाहन्छन्। हामी अभिभावक पनि आफ्ना सन्तान फर्केको हेर्न चाहान्छौँ। सरकारले हाम्रा सन्तान नेपाल फर्कने वातावरण बनाओस्।’

विश्वविद्यालयको कृषि विज्ञानतर्फ स्नातक तहको अन्तिम सेमिस्टरका ४९ जना विद्यार्थीमध्ये भदौ २६ गते १५ जना र भदौ २७ गते ३५ जना विद्यार्थी इजरायल गएका थिए। उनीहरुमध्ये १० जना छात्रा छन्। उनीहरु १० महिनाका लागि इजरायल गएका थिए।

विद्यार्थीले ‘लर्न एण्ड अर्न’ कार्यक्रम अन्तर्गत साताको एक दिन अध्ययन, पाँच दिन काम र एक दिन छुट्टीमा बस्ने उल्लेख थियो। कृषि विज्ञान संकायले कार्यक्रमअन्तर्गत पहिलोपटक विद्यार्थी पठाएको हो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।