काठमाडौं– नेकपा एमालेका अध्यक्ष केपी शर्मा ओलीले पुष्पकमल दाहाल ‘प्रचण्ड’ नेतृत्वको वर्तमान सरकारले भ्रष्टाचारको ढाकछोप गर्ने मात्र नभइ आफैंले भ्रष्टाचार गरिरहेकोसमेत आरोप लगाएका छन्।
उनले २ साउनमा बरामद भएको सुनको परिमाणमा प्रश्नसमेत उठाए। एमाले सुदूरपश्चिम प्रदेशको प्रथम अधिवेशनको उद्घाटनमा सम्बोधन गर्दै सुन तस्करीको अनुसन्धानमा सरकारले तमासा मात्र गरेको दाबी गरे।
उनले भने, ‘एमालेको सरकारको पालामा कहिले यति, कहिले ओम्नी भन्ने, अहिले १०० केजी सुनमा ६१ केजी भयो, ३९ केजी कहाँ गयो?’ सरकार तस्करी ढापछोप गर्न लागेकै कारण जाँचबुझ आयोग बन्न समय लागेकोसमेत उनले बताए।
ब्रेक–शुमा लुकाएर ल्याएको सुन भन्सार जाँचपास भइसकेको अवस्थामा राजश्व अनुसन्धान विभागले बरामद गरेको थियो। सुरुमा करिब एक क्विन्टल भनिएको सुन ब्रेक शुसहित जोख्दा १५५ किलो भएको थियो। राष्ट्र बैंकको टक्सार विभागले सुन निकालेर गालेर खोजेको थियो, जस क्रममा करिब ६१ किलो मात्र सुन भएको पुष्टि भएको थियो।
प्रधानमन्त्री प्रचण्ड जनताप्रति उत्तरदायी नभएको पनि ओलीले टिप्पणी गरे। अहिले देश चम्किने र जनता सम्झिने सरकार नभएको उनको भनाइ थियो। ओलीले प्रधानमन्त्री प्रचण्ड विदेश भ्रमण र धर्मकर्ममा मात्र केन्द्रित भएको बताए।
‘अहिले देशमा सरकार छ कि छैन? के दुई धाम गरेर मात्रै हुन्छ?,’ उनले भने, ‘जनतालाई माया नगरेपछि, देशलाई माया नगरेपछि चन्दन लगाएर गेरुवस्त्र लगाए पनि पाप कट्दैन, मानसरोवरमा डुबुल्की लगाउँदैमा पनि पाप कट्दैन।’
प्रचण्ड नेतृत्वको सरकार आएपछि मुलुकको अर्थतन्त्र ओरालो लागेको उनको आरोप थियो। ‘नेकपा एमालेले सरकार छाडेपछि अर्थतन्त्र ओरालो लाग्यो। हिंसा बढिरहेको छ। ७ प्रतिशतभन्दा माथि पुर्याइएको आर्थिक वृद्धि यो गठबन्धनले २ प्रतिशतभन्दा तल झारिसकेको छ,’ उनले भने, ‘देश अप्ठेरो अवस्थामा पुगेको छ। अझै अप्ठेरो गतिमा पुर्याउनु हुँदैन।’
सर्वसम्मत नेृतृत्व चयन गर्न निर्देशन
ओलीले सुदूरपश्चिमका नेताहरुलाई प्रदेश अधिवेशनबाट सर्वसम्मत नेतृत्व चयन गर्न निर्देशन दिएका छन्। आपसमा विभाजित भएर निजी उम्मेदवार उभ्याउने काम कसैले पनि नगर्न भन्दै ओलीले नेताहरु बसेर सर्वसम्मत नेतृत्व चयन गर्न निर्देशन दिएका हुन्।
ओलीले उपत्यका विशेष प्रदेश कमिटीले सदस्यदेखि अध्यक्षसम्म सर्वसम्मत चयन गरेको कुरा स्मरण गराउँदै सुदूरपश्चिमबाट पनि सोही सन्देश प्रवाह गर्न आग्रह गरे।
‘अहिलेसम्म कहिँ पनि सहमति हुन सकेन तर उपत्यका विशेष प्रदेश कमिटीले सदस्य र पदाधिकारी सबै सर्वसम्मत चयन गरेको छ। उहाँहरुलाई धन्यवाद छ, यो भन्दा ठूलो धन्यवाद तपाईंहरुलाई दिन पाउँ,’ ओलीले भने, ‘जिल्ला, भूगोल सबैतिर सर्वसम्मत बनाउनुस्। जसले कमिटीको नेतृत्व गर्न सक्छ सबै मिलेर उसलाई छान्नुस्। निजी उम्मेदवार उभ्याउने, जिद्दी गर्ने काम नगर्नुहो्स।’
ओलीले नेतृत्वले क्षमता, योग्यता र दक्षता हेरेर मूल्यांकन गर्ने बताउँदै आफ्नो मूल्यांकन कसैले पनि नगर्न भन्दै सबै नेताहरु बसेर टुंगो लगाउन निर्देशन दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
