काठमाडौं- बिहान गोरखाबाट उडेको अल्टिच्युड एयरको हेलिकोप्टर सम्पर्कविहीन भएको खबर सञ्चारमाध्यले एकाएक सम्प्रेषण गर्न थाले। ८ बजेर १८ मिनेटमा त्रिभुवन अन्तर्राष्ट्रिय विमानस्थलमा ल्यान्ड हुनुपर्ने हेलिकोप्टर बेपत्ता भएको सूचना आएपछि खोजी थालियो। अन्तत: दिउँसो दुर्घटनाग्रस्त अवस्था फेला पर्यो नुवाकोटको मेधाङ गाउँपालिकका १ मैलुङपाखास्थित जंगलमा।
चालकसहित ७ जना उडेकोमा ६ जनाले ज्यान गुमाए। महिला यात्रु आनी डोल्मा घाइते अवस्थामा फेला परिन्। उनको काठमाडौंको मेडिसिटी अस्पतालमा उपचार भइरहेको छ।
दुर्घटनामा पाइलट निश्चल केसीले पनि ज्यान गुमाएका छन्। जो दुई दशकभन्दा बढी समयदेखि हवाई उडानमा आबद्ध थिए।
काभ्रेको पनौती पुर्खौली घर भएका केसीको घर काठमाडौंको बानेश्वरमा छ। उनका श्रीमती, एक छोरा एक छोरी छन्।
सन् १९९४/९५ देखि उनले एभरेस्ट एयरबाट हवाई सेवा सुरु गरेका हुन्। उनी एमआई १७ चलाउँथे। यसपछि श्री एयरको एमआई १७ हेलिकोप्टर पनि उडाए।
उनले साना हेलिकोप्टरमा प्रवेश भने एयर डायग्नेस्टिकबाट गरेका हुन्। यसबीच उनले मनाङ एयर, सिम्रिम एयर, एभरेस्टमा लगायत हेलिकोप्टर चलाउँदै आएका थिए।
सहकर्मीहरुका अनुसार पाइलट केसी बिनाप्लान हेलिकोप्टर उडाउँदैन थिए। तर, दुर्भाग्य आज उनैले ज्यन गुमाउनुपरेको छ।
'मिलनसार, इमानदार र साथीभाइसँग कहिले रिसाउँदैन थिए,' उनीसँगै एभरेस्ट एयरमा प्रवेश गरेका (हाल मनाङ एयरका) राजु न्यौपानेले सम्झिए, 'कसैले केही भनेमा मुसुक्क हाँस्ने र जुरुक्क उठेर हिँड्ने स्वाभाव थियो।'
२० वर्षदेखि केसीसँगै काम गरेका सिम्रिक एयरलाइन्सका बजार व्यवस्थापक प्रज्ज्वल थापा यो खबर सुनेदेखि केही सोच्नै सकेका छैनन्।
'दक्ष भरपर्दा पाइलट थिए निश्चल,' उनले संक्षिप्तमा भने, 'आज बिहान मात्रै 'गोरखाबाट काठमाडौं आउँदैछु' भनेर सन्देश पठाएका थिए। मैले 'शुभयात्रा' भनेँ। आखिर त्यही नै अन्तिम संवाद हुन पुग्यो।'
केसीले हालसम्म ८ हजार घन्टाभन्दा बढी विभिन्न जहाज उडाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
