काठमाडौं- नेकपा एमाले बागमती प्रदेशले नेता-कार्यकर्ताहरुमा रहेका विभिन्न समस्या औंल्याएको छ। अधिवेशनका क्रममा प्रस्तुत प्रतिवेदनमा कार्यकर्ताहरुले नेताहरुले भेट्नुलाई मुख्य काम ठानिरहेको बताइएको छ।
समस्याहरुमा भनिएको छ, ‘कार्यकर्तामा योग्यता, क्षमता, क्रियाशीलता, इमान्दारिता र जनाधारभन्दा नेतृत्वसँगै नजिकिएर लाभ लिन खोज्ने प्रवृत्ति बढ्दो छ। अर्थात विभिन्न 'नेताहरूलाई भेट्ने काम नै पार्टीको मुख्य काम' हो भन्ने बुझाइ बढ्दो छ।’
नेताहरुमा पनि योग्यता, क्षमता र क्रियशिलताका आधारमाभन्दा निकटता आधारमा जिम्मेवारी दिने प्रवृत्ति बढेको बताइएको छ।
यसैगरी पार्टीका विभिन्न तहमा आफूलाई केन्द्र भागमा राखेर सोच्ने, योजना वनाउने र चल्ने व्यक्तिबादी प्रवृति बढ्दो रहेको समेत उल्लेख गरिएको छ।
युवा पुस्तामा पार्टीप्रतिको आकर्षण कमजोर रहेको बताउँदै आगामी दिन एमालेका लागि चुनौतीपूर्ण रहेको बताइएको छ। ‘राजनैतिक, वैचारिक प्रशिक्षणको अभावमा पार्टी पंक्ति दिशाविहीन बन्ने खतरा छ। पार्टी कमिटीहरू ठूला भएका कारण बैठकमा कोरम नपुग्ने, कार्ययोजना नबन्ने, कमिटीमा दोहोरो छलफल हुन नसक्ने हुँदा कमिटी प्रणाली लगभग समाप्त जस्तो छ,’ प्रतिवेदनमा उल्लेख छ।
यसैगरी विभिन्न जिल्लाहरूमा बहुआयामिक अन्तरविरोधका कारण पार्टी एकता कमजोर बनेको भनिएको छ। पार्टी कमिटीहरु स्वचालित हुने छाडेर माथिको भर पर्ने तथा निर्देशनमुखी बनिरहेको उल्लेख गरिएको छ।
उपत्यका बाहिरका कतिपय भूगोल कमिटी रहेकाहरू अधिकांश समय उपत्यकामा बस्ने, एउटा बैठकदेखि अर्को बैठकसम्म र एउटा अधिवेशनदेखि अर्को अधिवेशनमा मात्र उपस्थित हुने प्रवृत्तिले पार्टी काममा नकारात्मक प्रभाव परेको बताइएको छ।
यसैगरी महंगो निर्वाचन प्रणालीको कारण हैसियत हुनेहरूले उमेदवारी पाउने, कमजोर आर्थिक अवस्थाका कार्यकर्ता पछि पर्ने र निर्वाचन लडिहाले ऋणको भारले पलायन बन्नुपर्ने अवस्था देखा परिसकेकोमासमेत चिन्ता व्यक्त गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
