काठमाडौं– राष्ट्रिय स्वतन्त्र पार्टीका सभापति तथा सांसद रवि लामिछानेले सुन तस्करी प्रकरणमा सत्तारुढ दलका मानिसहरुमाथि गहिरो अनुसन्धान नभएको बताएका छन्।
आइतबार प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै सभापति लामिछानेले सुन तस्करी प्रकरणमा सत्तारुढ दलका मानिसहरुमाथिको अनुसन्धान हेर्दा भद्दा मजाक जस्तो देखिएको बताएका हुन्।
उनले सरकारले गर्ने अनुसन्धान ‘बम’ होला भन्ने अपेक्षा आफूहरुले गरेको भए पनि सलाईको काँटीजति पनि नपड्किएको टिप्पणी गरे। शंकाको घेरामा रहेका व्यक्तिहरु मोबाइल फम्र्याट गरेर प्रहरीकोमा पुगेको भन्दै उनले प्रहरी अनुसन्धानमा राजनीतिक हस्तक्षेप भएको हो कि भनी आशंका व्यक्त गरे।
उनले भने, ‘जुन आशा र अपेक्षाका साथ अनुसन्धान दिइयो, त्यो अनुसन्धानका कुराहरु हेर्दाखेरl भद्दा मजाक जस्तो भएर गयो। आज देखिएका मान्छेहरुले, मैले त्यतिखेरै भनेको थिएँ कि जब ३ दिनपछि यो अनुसन्धानमा पुग्यो। त्यो समय किन दिइएको? संदिग्ध मान्छेहरुलाई भाग्ने समय दिइयो कि? मोबाइल फम्र्याट गर्ने समय दिइयो कि के गरिएको भन्ने थियो? मलाई दुःख लागेको छ। सत्तारुढ दलका नेताहरुको नाम आउनेबित्तिकै जुन ढंगले त्यो अनुसन्धान त बम होला भन्ने सोचेको थिएँ त्यो पटका पनि भएन। सलाईको काँटी जतिपनि पड्किएन।’
उनले यो प्रकरणमा जति पनि नामहरु बएका छन्, उनीहरुले प्रयोग गर्ने फोन नै नदिएको र अर्को फोन प्रहरीकहाँ बुझाएको दाबीसमेत गरे। प्रहरीले केही गर्न चाहँदा चाहँदै पनि राजनीतिक हस्तक्षेप भएका कारण मिडिया ट्रायल गरेर सूचना लीक गर्ने बाध्यतामा पुगेको उनको भनाइ थियो।
उनले भने, ‘प्रहरी केही गर्न चाहन्छ, राजनीतिक हस्तक्षेप भयो, के भयो कुन्नी मिडिया ट्रायल गरेर सूचना लीक गर्ने बाध्यतामा पुगेको छ। त्यो कन्फिडेन्ट गृहमन्त्रीज्युले प्रहरीलाई दिन नसक्नुभएको हो कि? अथवा पार्टीभित्रको दबाब तपाईंले थेग्न नसक्नुभएको हो? यो स्पष्ट पार्नुपर्यो।’
उनले अनुसन्धाने सुनपानी छर्किने कामसमेत भएको आरोप लगाएका छन्। जति पनि सत्तारुढ दलका मानिसहरुको नाम आएको छ, ति नामहरुमा गहिरोसँग अनुसन्धान नै नभएको उनको दाबी छ। ‘सीआईबीको क्षमतामा मलाई अहिले पनि प्रश्न छैन। मलाई शंका राजनीतिक दल र नेताहरुले दबाब दिए कि, प्रभावमा पारे कि भन्ने लागेको छ। कयौं अनुसन्धान अपुरो भयो। अपुरो अनुसन्धान भएपछि अदालतले गर्ने आदेश आलोचित हुन्छ’, उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
