काठमाडौं- एउटै कम्युनिस्ट केन्द्र बनाउने उद्देश्यले वाम गठबन्धन निर्माण गरेका नेकपा एमाले, माओवादी केन्द्र र नयाँ शक्तिबीच उम्मेदवारी छनौटमा मनोनय गर्ने मिति नजिकिए पनि अझै बार्गेनिङ चलिरहेको छ।
प्रदेशसभा र प्रतिनिधिसभा निर्वाचनमा ६०/४० को भागवण्डा गरे पनि एमाले र माओवादी केन्द्रले मंगलबारसम्म उम्मेदावरको टुंगो लगाउन सकेका छैनन्।
प्रदेशसभा र प्रतिनिधिसभा निर्वाचनका लागि दलहरुले समानुपातिक तर्फ असोज २९ गते उम्मेदवारको बन्द सूची बझाउनुपर्ने कार्यसूची सार्वजिनक गरेको छ। पहिलो चरणको निर्वाचनका लागि कात्तिक ५ गते प्रत्यक्षतर्फ मनोनयन दर्ता गर्नुपर्नेछ।
पहिलो चरणमा ३७ जिल्लाका निर्वाचन क्षेत्रका लागि उम्मेदवारी दर्ता गराउनुपर्नेछ। यस्तै दोस्रो चरणको निर्वाचनका लागि दलहरुले कात्तिक १६ गते उम्मेदवारी दर्ता गराउनुपर्नेछ।
वाम गठबन्धनमा ६०/४० को भागवण्डा भए पनि कुन निर्वाचन क्षेत्रमा कसले कति सिट लिने भन्ने विषय अझै सहमतीमा पुग्न सकेको छैन।
वाम गठबन्धनमा रहेका एमाले, माओवादी केन्द्र र नयाँ शक्तिले आन्तरिक रुपमा आफ्नो सूची ल्याए पनि भागवण्डाका आधारमा उम्मेदवारको टुंगो लगाउन नसकेका हुन्। प्रदेश नम्बर १, २ र ३ मा सहमति जुट्न बाँकी रहेको र अन्य प्रदेशमा करिब-करिब सहमति जुटिसकेको वाम गठबन्धनका उम्मेदवार छनौट कार्यदलका संयोजक ईश्वर पोखरेलले बताए। पोखरेलले भने, 'आन्तरिक रुपमा सूची प्राप्त भइसकेको छ, चार वटा प्रदेशमा करिब-करिब सहमति जुटिसकेको छ। अन्यमा भने केही दिनमै हामी टुंगो लगाउँछौँ।'
वाम गठबन्धन उम्मेदवारको टुंगो लगाउन विगत तीन दिनदेखि नेताहरु बिस्तृत छलफलमा जुटिरहेका छन्। मंगलबार समेत शीर्ष तहमा यस विषयमा छलफल भएको थियो। एमाले संसदीय दलको कार्यालयमा उम्मेदवारको टुंगो लगाउन बसेको बैठक बिनानिष्कर्ष टुंगिएको थियो।
'निर्वाचन आयोगको समयसीमा ख्याल गर्दै हामी बृहत् छलफलमा छौँ, दुई दिनभित्र उम्मेदवारको टुंगो लाग्छ,' नेता पोखरेलले भने। यद्दपि, सोमबारको बैठकपछि पनि नेताहरुले उम्मेदवारको छिनोफाने मंगलबार लगाउने दाबी गरेका थिए।
यता, बृहत् लोकतान्त्रिक मोर्चा बनाउन लागिपरेको कांग्रेसले कुन-कुन पार्टीलाई मोर्चामा आबद्ध गराउने भन्ने टुंगो लागिसकेको छैन।
कांग्रेसले गठबन्धनमा सहभागी दलहरुलाई १ सय ६५ मध्ये ८० सिट दिने तयारी गरेको थियो। राप्रपा र राप्रपा प्रजातान्त्रिकले प्रतिनिधिसभामा १० सिट र प्रदेशसभामा ३० सिट दाबी गरेका छन्। बाँकी सिट मधेस केन्द्रित दललाई दिने मनस्थितिमा काग्रेंस छ। तर, मधेश केन्द्रित दल संघीय समाजवादी फोरम र राष्ट्रिय जनता पार्टीले आफ्नै तालमेल गरेर जाने विषयमा सहमति गरिसकेका छन्।
'कांग्रेससँग सिट संख्यामा कुरो मिलेको छैन। वार्ता सकरात्मक नभएपछि मधेस केन्द्रित दलबीच नै तालमेल गरी निर्वाचनमा जाने कि भन्ने विकल्पमा छलफल हुन थालेको छ,' राजपाका महासचिव केशव झाले भने।
नेपाल लोकतान्त्रिक फोरमले भने कांग्रेसकै मोर्चामा सहभागी हुनेगरी गृहकार्य गरिरहेको छ। 'हाम्रो कांग्रेससँग छलफल सकरात्मक भइरहेको छ। कांग्रेससँगै मोर्चाबन्दी गरेर चुनावमा जाने पार्टीको निर्णय छ,' नेता जितेन्द्र देवले भने।लोकतान्त्रिक मोर्चामा आवद्ध हुन चाहेका दलहरुले धेरै सिट दाबी गर्न थालेपछि कांग्रेसभित्र एक्लै निर्वाचनमा जानुपर्ने दबाब बढ्न थालेको छ।
कांग्रेसले मधेस केन्द्रित दल र दुई राप्रपा मिलाएर मोर्चा बनाउने गृहकार्य गरे पनि सिट संख्यामा सहमति नजुट्दा कांग्रेसभित्र एक्लै चुनावमा जाने विषयमा समेत बहस सुरु हुन थालेको हो।
कांग्रेस नेताहरुले वाम तालमेलबाट अत्तालिएर सिद्धान्त नमिल्ने दलहरुसँग मोर्चाबन्दी गर्नुभन्दा एक्लै चुनावमा जानुपर्ने विषयमा बहस थालेका हुन्।
मधेस केन्द्रित दलहरुलाई मोर्चामा ल्याएर अघि बढ्न सम्भव नभए एक्लै जाने विषयमा कांग्रेसमा बहस सुरु भएको नेता बालकृष्ण खाँडले बताए।
उनले भने, 'अहिलेको राष्ट्रिय आवश्कयता भनेको एकता र मेलमिलाप हो। सम्भव भएसम्म मोर्चा बनाउने, नभए वाम गठबन्धनलाई चुनौती दिन कांग्रेस एक्लै काफी रहेकाले धेरै नअलमलिने नीतिमा छ कांग्रेस।'
कांग्रेसभित्र रामचन्द्र पौडेल पक्षधरका नेताहरुले वाम गठबन्धनबाट अत्तालिएर लोकतान्त्रिक मोर्चामा सिद्धान्त नै नमिल्ने पार्टीहरुलाई सहभागी गराउन नहुने भन्दै विरोध गरिरहेका छन्। 'सिद्धान्त नमिल्ने पार्टीलाई सहभागी गराएर गठबन्धन निर्माण गर्न नहुने विषयमा केही साथीहरुले विचार राखिरहनुभएको छ। मोर्चाबन्दीको विषय दुई दिनभित्र टुंगो लगाउनेगरी छलफल जारी छ,' नेता मिनेन्द्र रिजालले भने।
गठबन्धनमा सिट संख्या टुंगो लगाउन लोकतान्त्रिक मोर्चाले बुधबार बैठक बोलाएको छ भने वाम गठबन्धनमा आवद्ध दलहरुले पनि टुंगो लाग्न बाँकी क्षेत्रमा सहमति जुटाउन छलफल गर्ने भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
