काठमाडौं - गणपूरक संख्या नपुगेपछि संसद् बैठक असोज २५ गतेसम्मका लागि स्थगित भएको छ।
भाषा आयोग विधेयक पेश गर्ने क्रममा गणपूरक संख्या अपुग भएपछि बैठक २५ गतेलाई सरेको हो । कात्तिक ५ गतेबाट संसदको अवधि समाप्त हुँदै गर्दा संसदले महत्वपूर्ण विधेयक पास गर्नुपर्ने भए पनि सरकारले ध्यान नदिँदा गणपूरक संख्या नपुगेर संसद् चौथो पटक स्थगित भएको हो।
मंगलबार संसद् बैठक तीन पटक बसेको थियो । दोस्रो बैठकले राप्ती स्वास्थ्य विज्ञान प्रतिष्ठान विधेयक र वस्तुको प्रत्यक्ष बिक्री सम्बन्धी विधेयक पारित गरेको थियो।
तेस्रो बैठकले स्वास्थ्य बिमा विधेयक २०७४ र भाषा आयोग विधेयक २०७४ पारित गर्ने कार्यसूची थियो । स्वास्थ्य बिमा विधेयक पारित भए पनि भाषा आयोग पारितका लागि पेश गर्दा नेपाल मजदुर किसान पार्टीका सांसद डिल्लीराज काफ्लेले गणपूरक संख्या यकिन गर्न माग गरे।
संविधानको धारा ७४ अनुसार कुनै पनि प्रस्ताव निर्णयार्थ पेश गर्दा १४९ संख्या आवश्यक पर्छ । तर, संसदमा तीन मिनेटको घन्टी बजाएर संख्या गणना गर्दा ९० जना सांसद मात्रै उपस्थित थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
