काठमाडौं- स्वास्थ्य तथा जनसंख्यामन्त्री मोहनबहादुर बस्नेतको इजीप्ट र शहरी विकासमन्त्री सीता गुरुङको नेदरल्याण्ड भ्रमण मन्त्रिपरिषद्ले स्वीकृत गरेको छ।
मंगलबार बसेको मन्त्रिपरिषद् बैठकले नेदरल्याण्ड्समा हुने पूर्वाधार लगानी सम्बन्धी कार्यक्रममा शहरी विकासमन्त्री गुरुङ्गको नेतृत्वमा सहभागी हुन स्वीकृति दिने निर्णय गरेको हो। यस्तै बैठकले इजिप्टको राजधानी कायरोमा आयोजना हुने ग्लोबल कांग्रेस जनसंख्या स्वास्थ्य र विकास विषयक सम्मेलनमा स्वास्थ्यमन्त्री बहादुर बस्नेतलाई सहभागी हुन स्वीकृति दिने निर्णय गरेको छ।
यसैगरी असोज ७ देखि १० गतेसम्म संयुक्त अधिराज्य लण्डनमा हुने ‘अन्तर्राष्ट्रिय अभियोजनकर्ता संघको २८औँ वार्षिक सम्मेलन तथा साधारण सभा’ कार्यक्रममा सहभागी हुन महान्यायाधीवक्ता डा दिनमणि पोखरेललाई स्वीकृत दिने निर्णय समेत बैठकले गरेको छ।
सङ्घीय मामिला तथा सामान्य संयुक्त राज्य अमेरिकाको न्यूयोर्कमा आयोजना हुने दिगो विकास लक्ष्य सम्मेलन २०२३ विषयक कार्यक्रममा सहभागी हुनका लागि जिल्ला समन्वय समितिका प्रमुखहरू सुनसरीका राजन मेहता, रसुवाका अशोक कुमार घिमिरे, काभ्रेपलाञ्चोकका दीपक कुमार गौतम, रुकुम पश्चिमका लुम्बिनी गौतम र खोटाङ्गका सन बहादुर राईलाई स्वीकृति प्रदान गर्ने निर्णय पनि बैठकले गरेको छ।
यी हुन् मन्त्रिपरिषद्का २० निर्णय
–संयुक्त अधिराज्यको लण्डनमा २०८० साल असोज ७ देखि १० सम्म आयोजना हुन लागेको ‘अन्तर्राष्ट्रिय अभियोजनकर्ता संघको २८औँ वार्षिक सम्मेलन तथा साधारण सभा’ कार्यक्रममा महान्यायाधीवक्ता डा दिनमणि पोखरेललाई सहभागी हुन स्वीकृति दिने।
–भन्सारसम्बन्धी कानूनलाई संशोधन र एकीकरण गर्न बनेको विधेयक सङ्घीय संसदमा पेश गर्न स्वीकृति दिने।
–निजीकरण ऐन, २०५० बमोजिम प्रतिनिधि सभा सदस्यद्वय माननीय राजेन्द्र कुमार केसी र माननीय माधव सापकोटालाई निजीकरण समितिको सदस्यमा मनोनीत गर्ने।
–नेपाल औषधि लिमिटेडको रिक्त महाप्रबन्धक पदमा श्री कैलाश कुमार पनेरु, डडेल्धुरा लाई नियुक्त गर्ने।
–ऊर्जा, जलस्रोत तथा सिंचाई विद्युतसम्बन्धी कानूनलाई संशोधन र एकीकरण गर्न बनेको विधेयक, २०८० सङ्घीय संसदमा पेश गर्न स्वीकृति दिने।
– अपराधसम्बन्धी राष्ट्रिय अभिलेख व्यवस्थापन तथा प्रहरी चारित्रिक प्रमाणपत्र वितरण निर्देशिका, २०८० स्वीकृत गर्ने।
–नेपाल र गणतन्त्र फिलिपिन्सबीच कूटनीतिक तथा सरकारी राहदानीबाहकलाई प्रवेशाज्ञा छुट दिनेसम्बन्धी सम्झौतामा हस्ताक्षर गर्न स्वीकृति प्रदान गर्ने।
–भूमिसुधार तथा मालपोत कार्यालय र नापी कार्यालय, नेपालगञ्ज बाँकेको कार्यक्षेत्रमा राप्ती सोनारी गाउँपालिका वडा नं ३,४,५,६ र ७ (साविकका बैजापुर गाविस, विनौना गाविस र फत्तेपुर गाविस) थप गर्ने।
–भूमि व्यवस्था, सहकारी तथा गरिबी निवारण मन्त्रालय अन्तर्गत सञ्चालन हुने आयोजना तथा कार्यक्रमहरु कार्यान्वयन गर्न आर्थिक वर्ष २०८०र८१ का लागि जम्मा ३८ राजपत्रांकित अधिकृतस्तरका अस्थायी दरवन्दी स्वीकृत गर्ने।
–सहकारी क्षेत्र सुधार सुझाव कार्यदल, २०८० को म्याद मिति २०८०/४/२६ बाट लागू हुने गरी एक महिना थप गर्ने।
–महिला बालबालिका तथा ज्येष्ठ नागरिक मन्त्रालयको संगठन तथा व्यवस्थापन सर्वेक्षण गर्न पूर्व स्वीकृति प्रदान गर्ने।
–साँगु खोला जलविद्युत आयोजना निर्माणका लागि दोलखा जिल्लाको विगु गाँउपालिकामा अवस्थित राष्ट्रिय वन क्षेत्र प्रयोग गर्न दिने।
–माथिल्लो सुरीखोला जलविद्युत आयोजना निर्माणका लागि गौरीशंकर संरक्षण क्षेत्रको सरकारी वन क्षेत्रको जग्गा प्रयोग गर्न दिने।
–साँगु खोला-१ जलविद्युत आयोजनाको विभिन्न संरचनाहरूको विकास निर्माणको लागि गौरीशंकर संरक्षण क्षेत्रको जग्गा प्रयोग गर्न स्वीकृति दिने।
–अरुण ३ जलविद्युत परियोजना निर्माणको क्रममा उत्पादन हुने वेष्ट म्याटर डिस्पोजलका लागि डम्पीङ क्षेत्र क्वेरी साइटको संरचनाहरू निर्माण गर्नका राष्ट्रिय वन क्षेत्र प्रयोग गर्न स्वीकृति दिने।
–बीपी कोइराला मेमोरियल प्लानेटोरियम तथा अब्जरभेटरी र विज्ञान सङ्ग्रहालय विकास समितिको कार्यकारी निर्देशक पदमा डा सनत कुमार शर्मालाई नियुक्त गर्ने।
–सङ्घीय मामिला तथा सामान्य संयुक्त राज्य अमेरिकाको न्यूयोर्कमा आयोजना हुने दिगो विकास लक्ष्य सम्मेलन २०२३ विषयक कार्यक्रममा सहभागी हुनका लागि जिल्ला समन्वय समितिका प्रमुखहरू सुनसरीका राजन मेहता, रसुवाका अशोक कुमार घिमिरे, काभ्रेपलान्चोकका दिपक कुमार गौतम, रुकुम पश्चिमका लुम्बिनी गौतम र खोटाङ्गका सन बहादुर राईलाई स्वीकृति प्रदान गर्ने।
–नेदरल्याण्ड्समा हुने पुर्वाधार लगानी सम्बन्धी कार्यक्रममा माननीय शहरी विकास मन्त्री सीता गुरुङ्गको नेतृत्वमा सहभागी हुन स्वीकृति दिने।
–इजिप्टको राजधानी कायरोमा आयोजना हुने ग्लोबल कांग्रेस जनसंख्या स्वास्थ्य र विकास विषयक सम्मेलनमा माननीय स्वास्थ्य तथा जनसङ्ख्या मन्त्री मोहन बहादुर बस्नेतलाई सहभागी हुन स्वीकृति दिने।
–नेपाल प्रशासन सेवा समुहीकरणतर्फको राजपत्राङ्कित विशिष्ट श्रेणीको रिक्त पदमा श्री दिनेशकुमार घिमिरेलाई बढुवा गर्ने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
