ब्युनस आयर्स- वर्तमान पुस्ताका उत्कृष्ट खेलाडी लियोनल मेसीले आउँदो वर्ष रुसमा आयोजना हुने विश्वकप फुटबल खेल्ने वा नखेल्ने बुधबार बिहान फैसला हुनेछ। मेसीको अर्जेन्टिनाले बुधबार विहान सवा ५ बजे इक्वेडरसँग प्रतिस्पर्धा गर्दैछ।
२ पटकको विश्व च्याम्पियन अर्जेन्टिनाले विश्वकपमा स्थान बनाउन इक्वेडरलाई पराजित गर्नै पर्नेछ। गत बिहीबार अर्जेन्टिनालाई उसैको घरमा पेरुले गोलरहित बराबरीमा रोकेपछि उसलाई यसपालिको विश्वकपमा समावेश हुने सम्भावना न्यून बनेको थियो।
दक्षिण अमेरिकी छनोट समूहमा शीर्ष ४ स्थान बनाउने देश सीधै विश्वकपका लागि छनोट हुन्छन्। पाँचौं हुने टिमले प्लेअफ अन्तर्गत ओसियाना क्षेत्रको न्युजिल्यान्ड विरुद्ध खेल्न पाउने र यसबाट विजयी एक टिमले विश्वकपमा प्रवेश पाउने प्रावधान छ।
पेरुसँग बराबरी खेलेपछि अर्जेन्टिना छैटौं स्थानमा झरेको छ। यो खेल नै अर्जेन्टिनाका लागि ‘गर् या मर्’ को स्थिति बन्नेछ। अब अर्जेन्टिनाले इक्वेडरलाई हराएर मात्र पुग्दैन पेरुको हार वा बराबरीको कामान पनि गर्नु पर्नेछ। बुधबार पेरु र चौथो स्थानको कोलम्बियाबीच खेल हुँदैछ।
अर्जेन्टिनी टिममा सबैभन्दी बढी दबाबमा मेसी छन्। सन्यास फिर्ता गरेर राष्ट्रिय टिममा फर्किएका मेसीमाथि टिमको विश्वास बढी छ, जसले उनीमाथि दबाब बढाएको थियो। त्यसो त छनोटका १७ खेलमा मेसीले ८ खेल मिस गरेका थिए। मेसी अनुपस्थित ८ खेलमा अर्जेन्टिनाले केवल ७ अंक मात्र जोडेको थियो।
अर्जेन्टिना समुद्री सतहभन्दा २८ सय मिटरमाथि रहेको क्युटो सहरमा इक्वेडर विरुद्ध खेल्दै छ। समुद्र सतह भन्दा निकै माथि रहेकाले खेलाडीलाई श्वासप्रश्वासमा समस्या पर्नेछ। इक्वेडरका फरवार्ड एन्टोनिया भ्यालेन्सियाले समेत आजकाल क्युटोमा खेल्न अप्ठ्यारो हुने गरेको बताएका छन्। यद्यपि इंग्लिस क्लब म्यानचेस्टर युनाइटेडका भ्यालेन्सियाले अर्जेन्टिनाविरुद्ध खेल्ने छैनन्।
वातावरणको अवस्था जेजस्तो भए पनि अर्जेन्टिनालाई विश्वकपमा छनोट हुन ३ अंक आवश्यक छ। क्युटो सहरमा अर्जेन्टिना पछिल्ला तीन भिडन्तमध्ये २ मा पराजित र एकमा बराबरीमा रोकिएको थियो।
पाँच पटकको फिफा विश्व खेलाडी मेसीको कप्तानीमा रहेको अर्जेन्टिनामा स्टार खेलाडीको जमघट भए पनि उसले राम्रो फिनिसिङ गर्न सकेको छैन। जसका कारण टिम संकटमा देखिएको छ। प्रशिक्षक जर्जे साम्पाउलीले अर्जेन्टिना अन्तिम खेलमार्फत विश्वकपमा छनोट हुने दाबी गरिसकेका छन्। उनले समर्थकलाई विश्वास दिलाउँदै भनेका छन् ‘हामीले गोल गर्न मात्र नसकेका हौं। म विश्वस्त छु, हामी विश्वकपमा छनोट हुनेछौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
