काठमाडौं– प्रधानमन्त्री पुष्पकमल दाहाल प्रचण्डले नेपालमा सामाजिक सुरक्षाको दायराबाट कोही पनि बाहिर नहुने बताएका छन्। बुधबार अनौपचारिक क्षेत्रका श्रमिक तथा स्वरोजगारमा रहेका व्यक्तिको सामाजिक सुरक्षा योजना शुभारम्भ समारोहमा बोल्दै प्रधानमन्त्री प्रचण्डले अब कोही पनि सामाजिक सुरक्षाको दायराबाट बाहिर नहुने बताएका हुन्।
उनले वैदेशिक रोजगारीमा रहेका श्रमिकहरु समेत सामाजिक सुरक्षाको दायरामा आएका उल्लेख गरे। उनले अनौपचारिक क्षेत्रका झन्डै ४० देखि ५० लाखसम्मका श्रमिकहरु र मजदुरलाई सामाजिक सुरक्षा कार्यक्रममा क्रमशः सहभागी गराइने बताए।
प्रधानमन्त्री प्रचण्डले छोटो समयमा नै झन्डै ३ लाख श्रमिकहरु सामाजिक सुरक्षामा आबद्ध हुनु सबैका लागि खुसी र गौरवको कुरा भएको दाबी गरे।
प्रधानमन्त्रीले सरकार क्षेत्रमा करारमा रहेका कर्मचारी लगायत सबैलाई पनि आबद्ध गर्नेतिर आफ्नो प्रतिबद्धता जाहेर गरे। ‘आजको दिनलाई श्रमिक अधिकार स्थापनाको एउटा महत्त्वपूर्ण ऐतिहासिक दिनका रुपमा हामी सबैले लिनेछौँ भन्ने मैले विश्वास गरेको छु। यो योजनाअन्तर्गत अनौपचारिक क्षेत्रका झन्डै ४० देखि ५० लाखसम्मका श्रमिकहरु र मजदुरलाई सामाजिक सुरक्षा कार्यक्रममा क्रमशः सहभागी बनाइनेछ,’ प्रधानमन्त्री प्रचण्डले भने।
प्रधानमन्त्री प्रचण्डले देशमा समाजवाद निर्माण गर्नका लागि पनि सामाजिक सुरक्षाको योजनालाई विशेष प्राथमिकताका साथ अगाडि बढाइएको बताए। अनौपचारिक क्षेत्रको खासगरी कृषि, निर्माण, यातायात र घरेलु श्रमिकको पक्षमा यस अभियानले गुणात्मक फड्को मार्ने प्रधानमन्त्रीले दाबी गरे।
उनले सामाजिक सुरक्षा कोषको संयन्त्र समाजमा उपेक्षित, उत्पीडित र अन्यायमा परेका श्रमिक लगायतका वर्गको संरक्षणको लागि एउटा महत्त्वपूर्ण संयन्त्र भएको पनि उल्लेख गरे।
‘सामाजिक सुरक्षा केवल सामान्य अवधारणा मात्र होइन हाम्रो लागि, यसले नागरिकले बिना भेदभाव शिक्षा, स्वास्थ्य, रोजगारी, अवसर, सहुलियत र सम्मान प्राप्त गर्ने वातावरण निर्माण गर्दै समाजवाद निर्माणको महाअभियान पनि हो यो,’ प्रधानमन्त्रीले भने।
संविधानकै मर्मलाई व्यवहारमा रुपान्तरण गर्न सामाजिक सुरक्षा योजनालाई विशेष प्राथमिकताका साथ अभियानका रुपमा अगाडि बढाउन पहल गरिएको प्रधानमन्त्रीले उल्लेख गरे। ‘अनौपचारिक क्षेत्र खासगरी कृषि, निर्माण, यातायात तथा घरेलु श्रमिकले हात, पाखुरा चल्दासम्म श्रम गर्ने र शारिरिक अस्वस्थता भएको खण्डमा आँसु चुहाउँदै रित्तो हात घर फर्किनुपर्ने नियतिमा यो अभियानले गुणात्मक फड्को हान्ने छ। ब्रेक थ्रु गर्नेछ भन्ने मेरो विश्वास छ,’ प्रधानमन्त्री प्रचण्डले भने।
उनले सामाजिक सुरक्षाको कार्यक्रम स्थायी र गुणस्तरीय हुँदै जानुपर्नेमा जोड दिए। प्रधानमन्त्री प्रचण्डले वर्तमान सरकार सुशासन, सामाजिक न्याय र समृद्धि स्थापनका लागि अगाडि बढिरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
