काठमाडौं- नेकपा एमालेका नेता भीम रावलले अध्यक्ष केपी शर्मा ओलीसँग सामान्य भलाकुसारी मात्रै भएको बताएका छन्। १०औँ महाधिवेशनपछि असन्तुष्ट रहेका एमाले नेता रावलको मंगलबार पार्टी कार्यालय च्यासलमा अध्यक्ष ओलीसँग भेट भएको हो।
भेटपछि सञ्चारकर्मीसँग कुराकानी गर्दै ओलीसँग सामान्य भलाकुसारी मात्रै भएको उनले बताएका छन्। ‘भेट नभएको धेरै भएको थियो। एकअर्कासँग भलाकुसारी भयो। देशको स्थिति, पार्टीको अवस्था कस्तो छ, आफ्ना सोच दृष्टिकोण कस्ता छन् भन्ने कुरा भयो,’ उनले भने, ‘फेरि कुराकानी गरौँ भन्ने मात्र भयो।'
धेरै लामो समयपछिको भेटघाट कस्तो रह्यो भन्नेबारे सोधिएको प्रश्नमा भने उनले जवाफ दिएनन्।
२०७८ मंसिर १०-१२ मा चितवनमा सम्पन्न एमालेको १०औँ महाधिवेशनमा अध्यक्ष पदमा ओलीविरुद्ध लडेका रावल त्यसयता पार्टी नेतृत्वप्रति असन्तुष्ट रहँदै आएका थिए। अध्यक्ष ओलीले भने उनलाई किनारा लगाउन खोजेका थिए।
गत मंसिर ४ मा सम्पन्न प्रतिनिधिसभाको निर्वाचनमा रावलले टिकट पाएका थिएनन्। अछामबाट २०४८ देखि निरन्तर प्रतिनिधिसभाको निर्वाचन लड्दै आएका रावललाई टिकट नदिई एमालेले रावलको चुनावी क्षेत्र अछाम-१मा झपट बोहोरालाई टिकट दिएको थियो। उक्त क्षेत्रमा बोहोरा एमालेबाट छुट्टिएको नेकपा एकीकृत समाजवादीका शेरबहादुर कुँवरसँग पराजित भएका थिए।
टिकट नपाएपछि रावल चुनावी प्रचारप्रसारमा पनि हिँडेका थिएनन्। मौन अवधि सुरु भएपछि मात्रै गृहजिल्ला अछाम पुगेका उनी पार्टीमा जिम्मेवारी नपाए पनि एमालेमै सक्रिय थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
