एजेन्सी- यतिबेला अमेरिकी पूर्वराष्ट्रपति डोनाल्ड ट्रम्पविलाई ६ जनवरी २०२१ मा क्यापिटल हिलमा भएको हिंसाको अभियुक्त मानी मुद्दामा कारबाही भइरहेको छ। उनले हिंसा भड्काउन भिडलाई उक्साएको दाबी गरिएको छ।
उनीविरुद्ध यसअघि नै सरकारी कागजातको दुरुपयोग र पोर्न स्टारलाई रकम भुक्तान गरेका मुद्दा चलिरहेकै छन्।
ट्रम्प २०२० मा अमेरिकाको राष्ट्रपति निर्वाचनमा डेमोक्र्याट नेता जो बाइडेनसँग पराजित भए। उनीविरुद्ध उक्त नतिजा उल्ट्याउन षड्यन्त्र गरेको आरोप पनि छ। उनले मत संकलन, गणना र प्रमाणीकरणमा अवरोध गर्ने क्रियाकलाप गरेको आरोप छ। उनले हारेपछि पनि सत्ता हस्तान्तरण गर्न अस्वीकार गरेका थिए।
अमेरिकी इतिहासमा यस्ता फौजदारी मुद्दा चलाइएको यो पहिलोपटक हो।
पछिल्लो मुद्दामा उनले बिहीबार वासिङ्टनस्थित अदालतमा उपस्थित भएर उक्त आरोपबारे जवाफ पनि दिए। उनको पक्षले मुद्दाको सुनुवाई छिटो गर्न माग गर्दैछ। किनभने २०२४ मा अमेरिकाको राष्ट्रपति निर्वाचनमा उनी पनि उठ्दैछन्। मुद्दाको सुनुवाई जति ढिलो भयो उनलाई चुनावमा त्यति नै हानी हुनेछ।
सबै मुद्दा एकै समयमा चलाउन नमिल्ने भएकाले पनि तत्काल सुनुवाई हुने सम्भावना भने कम छ। कुन मुद्दा पहिले चल्ने हो र कतिसमय लाग्ने हो भन्ने तय हुन बाँकी छ। चुनावका बेला महत्वपूर्ण मुद्दाको सुनुवाई हुने सम्भावना कम हुने भएकाले पनि उनको मुद्दा चुनावपछि सर्ने सम्भावना पनि छ।
त्यसकारण चुनावपछि मात्रै ट्रम्पविरुद्धको मुद्दाको सुनुवाई हुने सम्भावना धेरै छ।
यदि यी आरोपमा उनी दोषी ठहर भए उनलाई कडा सजाय हुनसक्नेछ। महत्वपूर्ण कागजातमा क्षति पुर्या एको मुद्दामा ट्रम्पलाई अधिकतम् २० वर्षको सजाय हुनसक्छ। यदि फैसला चुनाव अगाडि भयो र ट्रम्प दोषी ठहर भई जेल परे भने पनि उनी चुनाव लड्न भने पाउनेछन्। अमेरिकी कानुनअनुसार फौजदारी अभियोग लागेमा वा जेल परे पनि राष्ट्रपतिको चुनाव लड्न पाउने प्रावधान छ। यसअघि यूजीन डेब्स र लिन्डन लारुचेले अमेरिकामा आपराधिक मुद्दामा दोषी ठहर भएपछि राष्ट्रपतिको चुनाव लडेका थिए।
तर जेल परे भने उनको मत स्वभाविक घट्ने देखिन्छ। अहिले राष्ट्रपतिका सशक्त दाबेदारका रुपमा देखिएका ट्रम्प जेल परे भने उनको मत घट्ने आकलन गरिएको छ।
ट्रम्प दोषी ठहर हुने सम्भावना किन पनि छ भने मुद्दाको सुनुवाई न्यायाधीश तान्या चाटकनले गर्नेछन्। उनलाई बाराक ओबामा प्रशासनले नियुक्त गरेको थियो। चाटकन कडा सजाय दिने न्यायाधीशका रुपमा चिनिन्छन्। ६ जनवरीमा वासिङ्टनमा भएको हिंसाका दोषीलाई उनले यसअघि कठोर सजाय सुनाइसकेका छन्।
तर यदि दोषी ठहर भएर पनि ट्रम्पले चुनाव जिते भनेरु केही विश्लेषकहरू यसो भएमा ट्रम्पले आफूविरुद्धको मुद्दा खारेज गर्ने बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
