ठमेलस्थि भयना होटल (फाइल तस्बिर)
काठमाडौं– त्रिभुवन अन्तर्राष्ट्रिय विमानस्थलस्थित भन्सार कार्यालयको गेटबाट बरामद भएको १ क्विन्टल सुन तस्करी प्रकरणमा राजस्व अनुसन्धान विभागको टोलीले ठमेलस्थित भियना होटलका सञ्चालकलाई पक्राउ गरेको छ।
राजस्व अनुसन्धान विभागको टोलीले आइतबार बिहान भियना होटलमा छापा मारी सञ्चालक दावा छिरिङलाई पक्राउ गरेको हो। उनी यसअघि पनि विदेशी मुद्रा र सुनको अवैध कारोबारमा जोडिएका व्यक्ति भएका पाइएको विभाग स्रोतले जानकारी दिएको छ।
राजस्व अनुसन्धान विभागको टोलीले भियना होटलबाट केही महत्त्वपूर्ण कागजात समेत बरामद भएको जनाएको छ। कागजातबाट होटल सञ्चालक छिरिङको पनि संलग्नता रहेको देखिएपछि उनलाई नियन्त्रणमा लिइएको बताइएको छ। उनी बेल्जियन नागरिक भएका खुलेको छ।
राजस्व अनुसन्धान विभागको टवलीले काठमाडौंको टोखामा रहेको एउटा गोदाममा छापा मारेको थियो। उक्त गोदाममा सुनको स्वरुप परिवर्तन गरी भारत तस्करी गर्ने गरेको विभागको अनुसन्धानबाट खुलेको छ। हङकङबाट ब्रेक सुमा मोरेर ल्याइएको सुनको स्वरुप पनि टोखाको सोही गोदाममा परिवर्तन गर्ने गरेको पाइएको विभाग स्रोतले जानकारी दिएको छ।
राजस्व अनुसन्धान विभागको टोलीले साउन २ गते साँझ त्रिभुवन अन्तर्राष्ट्रिय विमानस्थलस्थित भन्सार कार्यालयको गेटबाट झन्डै १ क्विन्टल बराबर सुन बरामद गरेको थियो। मोटरसाइकल तथा स्कुटरको डिस्क ब्रेकको शू (ब्रेक प्याड)मा मोरेर ल्याइएको सुन भन्सारबाट जाँचपास भएर ट्याक्सीमा हालेर गन्तव्यतर्फ लैजाँदै गरेको अवस्थामा विभागको टोलीले बरामद गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
