काठमाडौं- नेकपा एकता राष्ट्रिय अभियानका नेतृत्वकर्ता बामदेव गौतमले एकीकृत समाजवादी र एमालेसँगको वार्ता असफल भएको बताएका छन्। उनले एमाले अध्यक्ष केपी शर्मा ओलीले आफ्ना साथीहरुलाई बामदेवलाई छाडेर आउन भनेको पनि खुलाएका छन्।
'नेकपा एमालेसँग एकता प्रयत्न गरियो। हाम्रो निर्णय भयो। त्यो निर्णय उहाँहरुलाई सुनाइयो। तर उहाँहरुले अरुअरुलाई बोलाउनुभयो। 'बामदेव किन आउनुपर्यो, तपाईं आइहाल्नुस्, आइहाल्नुस्' भनेर हाम्रो पार्टीका साथीहरुलाई उहाँहरुले बोलाउनुभयो', शनिबार आयोजित एक कार्यक्रममा गौतमले भने।
उनले आफ्ना नेताहरुले 'बामदेव नआइकन त हामी आउँदैनौँ' भनेर ओलीलाई जवाफ दिएको बताए। अन्तिममा अध्यक्ष ओलीले आफूलाई बोलाएकाले आफू गएको उनको भनाइ छ।
ओली र गौतमबीच असार ३ गते एमाले मुख्यालय च्यासलमा भेट भएको थियो। त्यस भेटमा एकताबारे कुरै नभएको गौतमले बताए।
'मलाई एकीकृत गर्ने र मलाई कामको व्यवस्थापन गर्ने सम्बन्धमा केही पनि विषय बोल्नुभएन। तपाईंले पार्टी फुटाउनुभयो। तपाईंले प्रचण्डलाई साथ नदिएर मलाई मात्रै साथ दिएको भए पार्टी फुट्ने थिएन। तपाईंले प्रचण्डलाई साथ दिनुभयो। मलाई आरोप लगाउनुभयो। त्यो आरोप यदि लागू हुन्थे भने मैले आज जेल जीवन बिताउनुपर्ने थियो। यस्तायस्ता काम गर्नुभयो। एमाले समाप्त गरेर माओवादीलाई बलियो बनाउन लाग्नुभयो भनेर भनिसकेपछि म त्यहाँ बस्ने र मेरो समूह, मेरो पार्टी पनि त्यहाँ रहनसक्ने स्थिति मैले देखिनँ', गौतमले भने।
उनले वार्ता सफल नभएपछि आफू ओलीलाई नमस्कार गरेर हिँडेको बताए। भने, 'मैले उहाँलाई नमस्कार गरेर, फेरिफेरि वार्ता गरौँला, बोलाउनुभयो भने आउने नै छु, ४३ वर्षको मित्रता छँदैछ, राजनीतिमा पो फरक होला, तर विभिन्न कालखण्डमा हामीले एउटाले अर्कालाई गरेका सहयोग निश्चिय नै गुनको रुपमा रहने नै छन् भनेर बिदा भएर आएँ।'
त्यसअघि एकीकृत समाजवादीसँगको एकता प्रयास पनि असफल भएको उनको भनाइ छ।
'एकीकृत समाजवादीले जबसम्म हामीले छलफल गरेर, हाम्रो एकता अभियानमा छलफल गरेर टुंगो लगाइसकेका थिएनौँ। तबसम्म 'आइजो, आइजो' भनिरहनुभयो। मसँग साथीहरु हुनुहुन्छ। तपाईंहरुको पार्टी जति शक्तिशाली नहोला। तर पनि पार्टीको नाम त छ नि त। सबैलाई समेटेर सबैलाई कसरी व्यवस्थापन गर्ने गरेर मात्रै म आउने हो। त्यसैले हाम्रो तर्फबाट निर्णय गरेर दुरुस्त हुन्छौँ। त्यसपछि तपाईंकहाँ आउँला भनियो। निर्णय गरेर जाँदा कुनै पनि जवाफ दिनुभएन', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779255893.png)
-1764146706.png)
