काठमाडौं- काठमाडौं महानगरपालिकाको १३औं नगर सभामा कार्यपालिका सदस्यहरुले फुटपाथको व्यवस्थापनदेखि जात्राको अभिलेख राख्नुपर्नेसम्मका सुझावहरु दिएका छन्।
सांस्कृतिक सहर, सुन्दर महानगर भन्ने मुल नारासहित सुरु भएको महानगरको अधिवेशनमा कार्यपालिका सदस्यहरुले विभिन्न क्षेत्र र विषय केन्द्रित सुझावहरु पेस गरेका छन्।
काठमाडौं महानगरपालिकाका प्रमुख प्रशासकीय अधिकृत बसन्त अधिकारीले नगर सभामा सूचना तथा सञ्चार विधेयक २०८०, महानगरीय प्रहरी विधेयक २०८०, जनस्वास्थ्य विधेयक २०८०, काठमाडौं महानगरपालिका भवन निर्माण मापदण्ड २०८०, काठमाडौं महानगर शिक्षा ऐन २०७५ संशोधन विधेयक, कर्मचारी सेवा ऐन २०७५ र स्वास्थ्य सेवा, नगर प्रहरी सेवा लगायतका सात वटा विषय कार्यसूचीमा रहेको जानकारी गराएका थिए।
महानगर प्रमुख बालेन्द्र शाहले कार्यसूचीको विषयमा कार्यपालिकाका सदस्यहरुको सुझाव माग गरेका थिए। सुझाव दिने क्रममा नगर सभा सदस्य टेकराज अधिकारीले काठमाडौं महानगरपालिका भित्र बस्ने ७० वर्ष उमेर नाघेका जेष्ठ नागरिकहरुलाई नि:शुल्क बीमा लागू गर्नुपर्ने, रातोकार्ड पाएका अपाङ्गहरुलाई नि:शुल्क स्वास्थ्य बीमा लागू गर्नका लागि बजेटको व्यवस्था गर्न माग गरे। उनले देशका थुप्रै जिल्लाहरुमा स्वास्थ्य बीमा लागू भएको र काठमाडौं महानगरपालिकामा लागू नभएका कारण तत्काल लागू गर्न समेत सुझाव दिए।
त्यसैगरी नगर सभा सदस्य नवीन मैनालीले ककनी गाउँपालिकाले काठमाडौं महानगरपालिका सहितका फोहोर फाल्ने गाडीबाट पैसा असुल्ने पत्र भेटाएको भन्दै त्यसबारे महानगरपालिकाको धारणा माग गरेका छन। उनले बेरुजु आतंक रोक्नुपर्ने सुझाव दिए।
त्यस्तै नगर सभा सदस्य हर्कबहादुर खातीले स्मार्ट शौचालय बनाउनु पर्ने माग गरे। उनले वीर अस्पातल अगाडि, न्युरोड, आन्दोलन हुने स्थान माइतीघर, माछापोखरी लगायतका क्षेत्रमा स्मार्ट शौचालय बनाउनका लागि बजेटको व्यवस्था गर्न माग गरे।
भगवान बुढाथोकीले भूमिहीन सुकुम्बासीहरुको व्यवस्था गर्नका लागि महानगरपालिकाले विशेष सम्बोधन गर्नुपर्ने बताए। उनले वास्तविक सुकुम्बासीहरुको घर बनाउनु पर्ने र हुकुमबासीहरुप्रति निर्मम बन्नु पर्ने सुझाव दिए। काठमाडौंमा कृत्रिम महँगी बढाइएको भन्दै महानगरले त्यसतर्फ विशेष ध्यान दिएर अनुगमन गर्न समेत सुझाव दिए।
नगर सभा सदस्य महेश नेपालीले करको दरभन्दा दायरा बढाउन सुझाव दिए। उनले काठमाडौंमा हुने इन्द्रजात्रा जस्ता विषयहरुको अभिलेखीकरण गर्नुपर्ने, वडाहरुको प्रोफाइल बनाउन बजेट छुट्याउनु पर्ने सुझाव दिए। नगर सभा सदस्यहरुले धूमपान गर्ने निश्चित स्थान तोक्नु पर्ने, महिलाको नाममा बजेटको मात्रा बढाउनु पर्ने लगायतका सुझाव दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771838848.png)
-1771837565.png)
-1764146706.png)
