काठमाडौं– दक्षिण तथा मध्य एसिया हेर्ने अमेरिकी सहायक विदेशमन्त्री डोनाल्ड लु शुक्राबार नेपाल आउँदैछन्।
मन्त्री लु एकदिने भ्रमणमा काठमाडौं उत्रिन लागेका हुन्। नेपालस्थित अमेरिकी दूताबासका अनुसार मन्त्री लुले उच्च तहको राजनीतिक भेट गर्नेछन्।
‘जुलाई १४ मा उहाँले नेपाल सरकारका नेतृत्वकर्ताहरूसँग शिष्टाचार भेट गर्नुहुनेछ र दूतावासका कर्मचारीहरूलाई पनि भेट्नुहुनेछ,’ दूताबाले जारी गरेको विज्ञप्तिमा उल्लेख छ।
यसका साथै मन्त्री लुले अमेरिकन चेम्बर अफ कमर्सको नेपालस्थित सदस्य संस्थासँग पनि भेट्ने कार्यक्रम रहेको राजदूतावासले जनाएको छ। उक्त भेटले नेपालीहरूको सीप विकासमा काम गर्ने उल्लेख छ।
‘नेपालीहरूलाई विश्वव्यापी रूपमा प्रतिस्पर्धा गर्न सक्षम बनाउने दिशामा अनुपम सीप प्रदान गर्न उहाँहरूले गरेका प्रयासका बारेमा पनि बुझ्नुहुनेछ,’ अमेरिकी दूतबासले जनाएको छ।
प्रधानमन्त्रीमा पुष्पकमल दाहाल प्रचण्ड नियुक्त भएपछि लु पहिलोपटक नेपाल आउन लागेका हुन्। पछिल्लो एक बर्षमा भने उनको दोस्रो भ्रमण हो।
मन्त्री लुले प्रधानमन्त्री प्रचण्ड र परराष्ट्रमन्त्री ऊनपी साउदसँग भेट गर्ने कार्यक्रम रहेको छ। तर यो बीचमा प्रधानमन्त्री पत्नी वियोगमा परेकोले उनिसंगको भेट भने अनौपचारिक हुन सक्ने परराष्ट्रका एक अधिकारीले जनाए।
खास–खास समयमा मन्त्री लु नेपालमा
मन्त्री लुको पछिल्लो २ वर्षमा तेस्रो भ्रमणका लागि शुक्रबार काठमाडौं उत्रिँदैछन्। यसअघि उनि महत्त्वपूर्ण समयमा नेपाल आएका थिए।
पहिलो भ्रमण उनले २०७८ मंसिरको पहिलो साता गरेका थिए। जतिखेर सिंगो मुलुक एमसीसीले विभाजित थियो। अन्तत: सोहि वर्ष उक्त परियोजनालाई संसद्ले अनुमोदन गर्यो।
दोस्रो भ्रमण २०७९ को साउनको दोस्रो सातामा भएको थियो। जतिखेर अमेरिकाको अर्को रणनीतिक परियोजना एसपीपीले संसद् र सडक तातेको थियो। तर एसपीपीबाट भने नेपाल पछि हटेको थियो।
एसपीपी सैन्य सम्बन्धीको एक रणनीतिक कार्यक्रम थियो, जुन नेपालले अंगिकार गर्ने परराष्ट्र नीति विपरीत थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
