काठमाडौं- नक्कली भुटानी शरणार्थी प्रकरणमा जिल्ला अदालत काठमाडौंको आदेशले थुनामा रहेका भुटानी नेता टेकनाथ रिजाललाई तत्काल रिहा गर्न ‘राजबन्दी रिहाइका लागि अन्तर्राष्ट्रिय अभियान’ले माग गरेको छ। उनलाई सुरक्षा थ्रेटका साथै स्वास्थ्यसम्बन्धी समस्या समेत भएकोले तत्काल रिहा गर्न अभियानले माग गरेको हो। अभियानका संयोजक राम कार्कीले बिहीबार एक विज्ञप्ति जारी गर्दै यस्तो माग गरेका हुन्।
अभियानले रिजालले दिएको बयानका कारण कतिपय अभियुक्तहरु समस्यामा परेकाले बयान फेर्न दबाब पनि आइरहेको दाबी गरेको छ।
‘हालैका समाचारहरूका अनुसार अभियान आफ्नो गहिरो चिन्ता व्यक्त गर्न चाहन्छ। टेकनाथ रिजाल भुटानका पूर्व राजनीतिक बन्दी वा लोकतन्त्रको लागि भुटानी आन्दोलनको सबैभन्दा अग्लो नेतालाई अन्य उच्च–प्रोफाइलका बन्दीहरूबाट अदालतको बयान परिवर्तन गर्न दबाब दिने प्रयास भइरहेको छ,’ विज्ञप्तिमा भनिएको छ, ‘रिजालका वकिल रामकुमार सुवालका अनुसार भीआईपी अभियुक्त टोपबहादुर रायमाझीका वकिलले रिजाललाई बयान फेर्न दबाब दिइरहेका छन्।’
यस बाहेक रिजाललाई अर्को थुनुवा इन्द्रजित राई अभियुक्तमध्ये एकसँगै राखिँदा सुरक्षा चिन्ता पनि भएको दाबी गरिएको छ।
‘रिजालले आफ्नो बयानमा मुख्य अपराधीको रूपमा नाम लिएका राईसँगै राखेको देखिन्छ। तसर्थ, यही कारणले रिजालमा निरन्तर मनोवैज्ञानिक तनाव र असुरक्षा बढ्दै गएको छ,’ विज्ञप्तिमा भनिएको छ, ‘रिजाल कमजोर र फिक्का देखिनुभएको छ र उहाँले बस्ने राम्रो ओड्ने, ओछ्याउने उपलब्ध गराउन अनुरोध गर्दा कारागार प्रशासनले बेवास्ता गरेको छ, जसको अभावमा उहाँ बारम्बार चिसोका कारण अस्वस्थ हुनुभएको छ।’
उनीहरुले मानव अधिकारको आवाज उठाउने १ लाखभन्दा बढीलाई देश निकाला भुटानले गरेको र यसका लागि आवाज उठाउँदै आएका रिजाल अहिले थुनामा रहेको उल्लेख गरेको छ।
‘भुटान भित्रै रहेका मानवअधिकारका पक्षधरलाई खोजीखोजी जेलमा बन्दी बनाइएको छ,’ विज्ञप्तिमा भनिएको छ, ‘दु:खदायी र पीडादायी जीवन बिताउन भुटानी राजाले विवश बनाइरहेका छन्। उनीहरूको तत्काल रिहाइका लागि भुटानी राजबन्दी रिहाइका लागि अन्तर्राष्ट्रिय अभियान अन्तर्राष्ट्रिय समुदायसँग अपिल गर्दछ।’
नक्कली शरणार्थी प्रकरणमा पक्राउ परेकामध्ये दुई जना अभियुक्त बाहेक अन्य सबै थुनामा रहेका छन्। नेपाली कांग्रेसका नेता एवं पूर्व गृहमन्त्री बालकृष्ण खाण, एमाले नेता एवं पूर्व उपप्रधानमन्त्री टोपबहादुर रायमाझी, सचिव टेकनारायण पाण्डेसहितका प्रतिवादीहरु केन्द्रीय कारागार सुन्धारामा रहेका छन्। जिल्ला अदालतले उनीहरुलाई धरौटीमा रिहा गर्न अस्वीकार गर्दै पूर्पक्षका लागि थुनामा पठाएको छ। थुनामा रहेकामध्ये केहीले उच्च अदालतमा पुनरावेदन गर्ने तयारी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
