काठमाडौं– प्रधानमन्त्री पुष्पकमल दाहाल प्रचण्डकी पत्नी सीता दाहालको शव नेकपा माओवादी केन्द्रको पार्टी मुख्यालय पेरिसडाँडाबाट पशुपति आर्यघाटतर्फ लगिएको छ। पशुपति आर्यघाटमा राजकीय सम्मानका साथ दाहालको अन्त्येष्टि गरिँदैछ।
बुधबार नै आकस्मिक रुपमा बसेको मन्त्रिपरिषद्को बैठकले ‘प्रथम महिला’को रुपमा राजकीय सम्मानसहित दाहालको अन्त्येष्टि गर्ने निर्णय गरेको हो।
प्रधानमन्त्रीपत्नी ६९ वर्षीया दाहालको बुधबार बिहान ८:३३ बजे नर्भिक अस्पतालमा उपचारका क्रममा निधन भएको थियो।
दाहालको निधनपछि बसेको मन्त्रिपरिषद्को आकस्मिक बैठकले ‘प्रथम महिला’को दाहालको अन्तिम संस्कार गर्ने निर्णय गरेको हो।
मन्त्रिपरिषद् बैठकबारे जानकारी दिँदै सरकारका प्रवक्ता एवम् सञ्चार तथा सूचना प्रविधिमन्त्री रेखा शर्माले दिवंगत सीता दाहालको अन्त्यष्टिको समयमा राजकीय सम्मान स्वरुप नेपाली सेनाको २ सेनामुख, स्कर्टपति सहसेनानीको एक टुकडीद्वारा सलामी दिने व्यवस्था मिलाउने भएको जानकारी दिइन्।
बिहान ११ बजेपछि दाहालको शव नर्भिक अस्पतालबाट पेरिसडाँडा लगिएको थियो। पेरिसडाँडा पुगेर विभिन्न दलका नेता, नेपाल सरकारका उच्चपदस्त अधिकारी, विभिन्न देशका राजदूत लगायतले दाहालप्रति अन्तिम श्रद्धाञ्जली अर्पण गरे।
दाहाललाई श्रद्धाञ्जली व्यक्त गर्न सभामुख देवराज घिमिरे, उपसभामुख इन्दिरा राना, नेकपा एकीकृत समाजवादीका अध्यक्ष माधव कुमार नेपाल, राप्रपाका अध्यक्ष राजेन्द्र लिङ्देन, राप्रपा नेपालका अध्यक्ष कमल थापा, नेकपा एमालेका उपाध्यक्षद्वय सुवासचन्द्र नेम्वाङ र विष्णु पौडेलसहित नेताहरु पेरिसडाँडा पुगेका थिए।
यस्तै, नेपालस्थित चीन र इजरायल लगायत देशका राजदूत पनि दाहाललाई श्रद्धाञ्जली व्यक्त गर्न पेरिसडाँडा पुगेका थिए।
प्रधानमन्त्री तथा माओवादी केन्द्रका अध्यक्ष प्रचण्डले पत्नी दाहालको शवमा पुष्पहार अर्पण गरेपछि पेरिसडाँडामा श्रद्धाञ्जली दिने क्रम सुरु भएको थियो। पत्नीको शवमा कम्युनिस्ट पार्टीको झण्डा र पुष्पहार अर्पण गर्दा प्रचण्ड भावुक देखिए। छोरीहरु रेणु र गंगा दाहालसहित परिवारका सदस्यहरु भावविह्वल अवस्थामा पेरिसडाँडा पुगेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
