धनगढी– सुदूरपश्चिम प्रदेश सरकारले आगामी आर्थिक वर्ष २०८०/८१ का लागि ल्याएको बजेट पारित हुनेमा अन्योल देखिएको छ। सत्ता पक्षकै दलले बजेटलाई समर्थन नगर्ने निर्णय गरेपछि बजेट पारितबारे थप अन्योल उत्पन्न भएको हो।
समर्थन नगर्ने निर्णय सत्तारुढ नेकपा माओवादी केन्द्र, नागरिक उन्मुक्ति र एकीकृत समाजवादी रहेका छन्। सुदूरपश्चिममा सरकारको नेतृत्व नेपाली कांग्रेसले गरिरहेको छ। सोमबार बसेको तीन दलका संसदीय दलका नेताहरुको बैठकले बजेट समर्थन नगर्ने निर्णय गरेको हो।
आगामी आर्थिक वर्षको बजेट ल्याउँदा आफ्ना दलका नेतासँग छलफल नगरिएको तथा सुझावलाई नसमेटिएको भन्दै बजेट पारितमा सहयोग नगर्ने निर्णय गरिएको हो। नेकपा माओवादी संसदीय दलका नेता खगराज भट्ट, नेकपा एकीकृत समाजवादी पार्टीका दलका नेता दीर्घबहादुर सोडारी र नागरिक उन्मुक्ति पार्टी संसदीय दलका नेता घनश्याम चौधरीले उक्त निर्णय गरेका हुन्।
निर्णयमा भनिएको छ, ‘जनताको आवश्यकता र औचित्य विपरीत बजेट आएको छ। उक्त बजेटका विषयगत क्षेत्रहरुमा पनि पूरै सन्तुलन नभएको, राजनीतिक नेतृत्व मुखदर्शक भएको अनुभूति भएको छ।’
उनीहरुले समयमै बजेट सन्तुलित बनाउन माग गरेका छन्। अघि भनिएको छ, ‘जनता र जनताका जनप्रतिनिधिको भावना समेटेर प्रदेशको समग्र विकास र समृद्धिको यात्रामा अगाडि बढाउन बजेट संशोधनको प्रक्रिया अगाडि बढाउन सुदूरपश्चिम प्रदेश सरकारलाई आग्रह गर्दछु।’ बजेट संशोधन र समझदारी नभएकोले यथास्थितिमा बजेटलाई समर्थन गर्न नसकिने निर्णयमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1709961276.jpg)
-1786602170.png)
