प्रधानमन्त्री प्रचण्डले मिटरब्याजीबाट मारिएको आशंका गरेका युवा नेता को हुन्?

राजनीति

नेपाल लाइभ सोमबार, असार २५, २०८० १८:०५

काठमाडौं– प्रधानमन्त्री पुष्पकमल दाहाल प्रचण्डले सोमबार प्रतिनिधि सभामा आफ्नो पार्टीका एक युवा नेताको मिटरब्याजीबाट हत्या गरिएको आशंका गरेका छन्। उनले मिटरब्याजसम्बन्धी अध्यादेशको विषयमा बोल्ने क्रममा यस्तो बताएका हुन्।

उनले भने, ‘हाम्रो पार्टीको एकजना युवा नेताको रहस्यमय मृत्युसँग पनि मिटरब्याज जोडिएको छ। यही मिटरब्याजीकाविरुद्ध संघर्ष गर्ने क्रममा उहाँको हत्या भएको आशंका गरिएको छ। पार्टीले आयोग बनाएर छानबिन गर्दा पनि रहस्यमय नै देखियो। कतै मिटरब्याजको विरोध गरेबापत् हत्या त गरिएन, भन्ने ठूलो पीडाबाट गुज्रिँदै आएका हौं।’

प्रचण्डले ‘मारिएको’ आशंका गरेका तत्कालीन नेकपाका केन्द्रीय सदस्य तथा सर्लाही जिल्ला इन्चार्ज डाचाराज वाग्ले हुन्। २०७७ माई २१ गते राति सर्लाहीको बरहथवा नयाँसडक सडकखण्डमा उनी सवार मोटरसाइकल दुर्घटनाग्रस्त रहेको अवस्थामा मृत फेला परेका थिए।

वाग्ले मिटरब्याजीविरुद्ध आवाज उठाइरहेका थिए। स्थानीय रुपमा विरोध गर्नुका साथै उनी पीडितसहित काठमाडौंसम्म आउने गरेका थिए। २०७६ पुसमा उनले ३५ जना पीडितलाई लिएर तत्कालीन सत्तारुढ दल नेकपा नेतृत्व, गृहसचिव प्रेमकुमार राई र प्रहरी प्रमुखलाईसमेत काठमाडौंमा भेटेका थिए। सर्लाहीको बरहथवा १०, मुर्तियाका रामबाबु राय र सर्लाही ब्रम्हपुरीका संजयकुमार रौनियारले आफूहरूलाई ठगेको गुनासो उनीसँगै आएका पीडितहरुले गरेका थिए।

२०७७ साल फागुन ६ गते प्रचण्ड उनको १३ औं पुण्यतिथिमा त्यहाँ पुगेका थिए। त्यहाँ आयोजित श्रद्धाञ्जली सभालाई सम्बोधन गर्दै उनले रहस्यमय रहेको बताएका थिए। ‘उनको मृत्यु सामान्य दुर्घटनाबाट मात्र भएको छैन। यसमा ठूलो रहस्य लुकेको छ,’ प्रचण्डले भनेका थिए।

केन्द्रीय सदस्य प्रल्लाद बुढाथोकीको संयोजकत्वमा पार्टीले आन्तरिक छानबिन समिति गठन गरेको थियो। उक्त समितिले घटना रहस्यमय रहेको बताएको थियो। मृतक वाग्लेले मिटरब्याजी, सुदखोरका कारण प्रताडित सयौं महिलालाई न्याय दिलाएको प्रचण्डले त्यतिबेला उल्लेख गरेका थिए। आफूले तिनवटै सुरुक्षा निकायका प्रमुखलाई भेटाइदिएको बताएका थिए। उनले भनेका थिए, ‘त्यस्ता पीडितलाई लिएर मेरो निवास खुमलटार पटक–पटक आउँदा तीनवटै सुरक्षा निकायका प्रमुख, सम्बन्धित मन्त्री, सचिव लगायतलाई त्यसबारे कारबाही अभियान अगाडि बढाउन निर्देशन दिएको थिएँ।’

गत वैशाख १६ गते सर्लाही पुगेका उपप्रधान तथा गृहमन्त्री नारायणकाजी श्रेष्ठले उनको मृत्यु मिटब्याजकाविरुद्ध आवाज उठाउँदै आएको समयमा भएको बताउँदै हत्याको आशंका व्यक्त गरेका थिए। वाग्ले घटनामा केन्द्रीय अनुसन्धान ब्यूरोले अनुसन्धान गरिरहेकोसमेत जानकारी गराएका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

ग्यास सिलिन्डर विस्फोट हुँदा १४ जना घाइते

कर्तव्य ज्यान मुद्दामा फरार २० बर्ष पछि पक्राउ

कीर्तिपुर क्रिकेट मैदानको स्तरोन्नतिको काम समयमै सक्न प्रधानमन्त्रीको निर्देशन