काठमाडौं- प्रधानमन्त्री पुष्पकमल दाहाल ‘प्रचण्ड’ले गत असार १८ गते एक पुस्तक विमोचनका क्रममा आफूले दिएको अभिव्यक्तिको विषयमा गम्भीर प्रश्न उठेपछि सदनबाटै जवाफ दिन चाहेको बताएका छन्। सदनबाटै जवाफ दिनका लागि आफूले प्रयास गरेको उनले बताए।
सोमबार प्रतिनिधि सभामा जवाफ दिने क्रममा उनले भने, 'माननीय सदस्यहरुले यहाँ बोल्दा स्पष्ट पार्नु पर्दैन? भनेर गम्भीर ढंगले बोल्नुभयो। मैले सुरुदेखि नै स्पष्ट पार्नका लागि पर्खेर बसेको थिएँ। तर मलाई थाहा छैन किन संसद् अवरुद्ध गरियो? राजीनामा नआएसम्म संसद् चल्न दिइँदैन भनेर किन भनियो मैले बुझ्न सकेको छैन। के यही हो संसदीय अभ्यास?'
आफूलाई राप्रपा सांसद राजेन्द्र लिङ्देनले नैतिकताको प्रश्न उठाएपछि उनले त्यस्ता प्रश्न उठाउन पाइने बताए। 'तर संसद् अभ्यास र पद्धति के हो भन्ने कुरा प्रतिपक्षीलाई राम्रोसँग थाहा छ। स्पष्टीकरणको मौका पनि नदिई राजीनामा', उनले भने।
उनले आफूले संसद्मा उभिएर यथार्थ भन्न पाउनुपर्दैन? भन्ने प्रश्न गरे। उनले थपे, 'किन तीन दिनसम्म संसद् अवरोध गरियो? मैले बुझ्न सकिनँ। के प्रतिपक्षीले राजीनामा माग्ने बित्तिकै दिनुपर्ने हो? यही हो परम्परा र विधि? के प्रतिपक्षीले प्रश्न उठाउने बित्तिकै प्रधानमन्त्रीलाई सदन समक्ष स्पष्टीकरणको मौका पनि दिन पनि नहुने हो? यो मेरो प्रश्न मात्रै हो।'
उनले आफू प्रतिवादका लागि नभई स्पष्टीकरणका लागि आएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
