काठमाडौं– बिम्स्टेकको स्थायी सचिवालय बंगलादेशमा निर्माण हुने भएको छ। बुधबार बसेको बिम्स्टेकका परराष्ट्र मन्त्रीस्तरीय बैठकमा उक्त सहमति भएको हो। बैठकमा बिम्स्टेक सचिवले सचिवालय निर्माणको विषयलाई प्राथमिकताका साथ उठाएका थिए।
बिम्स्टेक मन्त्रीस्तरीय बैठक मंगलबार बसेको बिम्स्टेक सचिवस्तरीय १९औँ विशेष बैठकको निरन्तरता हो।
मन्त्रीस्तरीय बैठकले बिम्स्टेक उर्जा र मौसम सम्बन्धी केन्द्र भारतमा, प्रविधि सम्बन्धी केन्द्र श्रीलंकामा, साँस्कृतिक अवलोकन केन्द्र भुटानमा निर्माण गर्ने लगायत विषयमासमेत सहमति जुटाएको छ। यसका साथै नयाँ सहकार्यका क्षेत्र अन्तर्गत भन्सार क्षेत्र तथा तटीय ‘सिपिङ’मा सहकार्य गर्ने लगायत सहमति भएको बैठकपछि आयोजित पत्रकार सम्मेलनमा परराष्ट्र मन्त्रालयका प्रवक्ता भरतराज पौडेलले बताए।
मन्त्रीस्तरीय बैठकमा बिम्स्टेकलाई प्रभावकारी बनाउँदै नतिजाउन्मुख बनाउने विषयमा सहमति भएको पौडेलले बताए। बिम्स्टेक स्वतन्त्र व्यापारको क्षेत्रलाई प्रभावकारी बनाउने विषयमा पनि बैठकमा छलफल भएको छ। बिम्स्टेक स्वतन्त्रव्यापार क्षेत्रमा सन् २००४ मा नै हस्ताक्षर भएपनि कार्यान्वयनमा भने आएको छैन। स्वतन्त्र व्यापार क्षेत्रमा भारतको विशेष रुची रहेको परराष्ट्र मन्त्रालयका एक अधिकारीले बताए।
मन्त्रीस्तरीय बैठकमा परराष्ट्र मन्त्री ज्ञवालीले ‘इतिहास, भूगोल, संस्कृति, सभ्यताका कारण बिम्स्टेक एक पृथक संगठन भएको’ बताएको कार्यक्रमपछि मन्त्री ज्ञवालीलाई उधृत गर्दै परराष्ट्र प्रवक्ता पौडेलले बताए। बैठकमा मन्त्री ज्ञवालीले गरिबी निवारण, भोकमरी, पछौटेपन, सामाजिक असमानता, प्राकृतिक प्रकोप, वातावरणीय प्रदूषण लगायतका मुद्धालाई साझा रुपमा हल गर्नुपर्ने विषयलाई महत्वका साथ उठाएका थिए।
अध्यक्ष राष्ट्रको हैसियतमा मन्त्रीस्तरीय बैठकको अध्यक्षता परराष्ट्रमन्त्री ज्ञवालीले गरेका थिए।
कार्यक्रममा बंगलादेशका विदेशमन्त्री अबुब हसन मैयुव अली, भुटानका विदेश सचिव सोनाम चोङ, भारतका विदेश राज्यमन्त्री जनरल डा विके सिंह, म्यानमारका विदेशमन्त्री युक्यो टिङ, श्रीलंकका विदेशमन्त्री वसन्त सेनानायके र थाइल्याडका विदेशमन्त्री डोन प्रमुद बियानीको सहभागीता रहेको थियो।
यस्तै, आजको बैठकबाट नेपालका परराष्ट्रमन्त्री ज्ञवालीले मन्त्रीस्तरीय बैठकको अध्यक्षता श्रीलंकका विदेशमन्त्री वसन्त सेनानायकेलाई हस्तान्तरण गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
