काटमाडौं- ललिता निवासको जग्गा कीर्ते प्रकरणमा पक्राउ पर्नुअघि नै अन्तरिम आदेश लिएका आरोपितहरुले दायर गरेको रिट करिब ९ महिनासम्म दोस्रो सुनुवाइ नै नभएको पाइएको छ। टीकाराम घिमिरे समेतले २०७९ साउन ४ गते दायर गरेको रिट हालसम्म एक पटक मात्र सुनुवाइ भएको सर्वोच्च अदालतको पेसी तथ्यांकमा देखिन्छ।
२०७९ साउन १९ गते न्यायाधीश ईश्वर खतिवडाको इजलासले कारण देखाउ आदेशसहित अन्तरिम आदेश जारी गरेको थियो। उक्त आदेशपछि उनीहरुलाई पक्राउ पर्ने बाटो बन्द भएको थियो। त्यसपछि उक्त मुद्दा एक पटक मात्र पेसीमा चढेको छ।
२०८० असार १५ गते उक्त मुद्दाको पेसी तोकिएको थियो। उक्त दिन सर्वोच्च स्थगितको सूचीमा मुद्दा पर्यो अनि सुनुवाइ नै भएन। उक्त दिन स्थगितको ४८औं नम्बरमा मुद्दा परेको थियो। त्यसअघि २०७९ साउन १९ गते पेसी तोकिएको थियो। उक्त दिन न्यायाधीश खतिवडाको इजलासले अन्तरिम आदेश जारी गरेको थियो ।
सरकारले पनि दर्ता गरेन भ्याकेट
यो अवधिमा नेपाल प्रहरीको केन्द्रीय अनुसन्धान ब्युरोले उक्त प्रकरणमा अनुसन्धान गरिरहेको थियो। अनुसन्धानका लागि सरकारी वकिलले पुन: थप अनुसन्धान गर्नु भन्दै फाइल फिर्ता पठाएको थियो। यही अवस्थामा उनीहरुले सर्वोच्चबाट अन्तरिम आदेश जारी भएपछि सरकारले त्यसको खारेजीका लागि निवेदन दिनुपर्ने तर्क काननुविद्हरुको छ।
सरकार अनुसन्धानमा रहेको मुद्दामा अन्तरिम आदेश जारी हुन नहुने भन्दै दाबी गर्नुपर्नेमा मौन बसेको थियो। सरकार मौन बस्दा मंगलबार प्रहरीले अनुसन्धानका लागि पक्राउ गरेकामध्ये तीन जनालाई छोड्नु परेको थियो। छुट्नेमध्ये मालपोत कार्यालय डिल्लीबजारमा कार्यरत कर्मचारीहरु रहेका छन्।
मालपोत कार्यालय डिल्लीबजारका तत्कालीन प्रमुख कलाधर देउजा, सुरेन्द्रमान खपाली र भूपेन्द्रमणि केसी मंगलबार साँझ नै छुटेका थिए। उनीहरु छुटेपछि उनीहरु मात्र नभई यो प्रकरणमा जोडिएका १७ जनालाई सर्वोच्च अदालतले गत साउनमै पक्राउ नगर्न भन्दै अन्तरिम आदेश दिएको सार्वजनिक भएको थियो।
यो प्रकरणमा अनुसन्धान गरिरहेको केन्द्रीय अनुसन्धान ब्यूरो सीआईबीले पक्राउ गर्ने सुइँको पाएलगत्तै उनीहरु सर्वोच्च अदालत पुगेका थिए। १७ जनाले प्रधानमन्त्री तथा मन्त्रिपरिषद्को कार्यालय, गृह मन्त्रालय, महान्यायाधिवक्ताको कार्यालय, प्रहरी प्रधान कार्यालय, काठमाडौं जिल्ला अदालत, जिल्ला सरकारी वकिल कार्यालय, केन्द्रीय अनुसन्धान ब्यूरो सीआईबी र समरजंग कम्पनी बालुवाटारविरुद्ध रिट दायर गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786783778.jpg)
-1786602170.png)
