काठमाडौं– जनता समाजवादी पार्टी, नेपाल (जसपा)ले पहिचानमा आधारित प्रादेशिक संरचना बनाउने भएको छ। पहिचानमा आधारित राष्ट्रिय समितिहरूले मूलतःराजनीतिक तथा पहिचानको आन्दोलनसँग सम्बन्धित कार्यहरू गर्ने गर्ने जसपाको प्रस्तावित विधानमा उल्लेख छ।
आइतबारदेखि सुरु हुने जसपाको विधान अधिवेशनमा उक्त प्रस्ताव राखिने भएको हो। प्रस्तावित विधानमा भनिएको छ, ‘पहिचानमा आधारित प्रादेशिक संरचनाहरू लिम्बुवान, किराँत, मधेस, शेर्पालुङ, नेवाः, ताम्सालिङ, तमुवान, मगरात, थरुहट, खसान र शिल्पी/दलित विशेष समिति हुने छन्।’
कोशी प्रदेशको नाम पहिचानसहित राखिनुपर्ने माग गर्दै आन्दोलन भइरहेका बेला जसपाले यस्तो प्रस्ताव गरेको हो।
अध्यक्षपछि वरिष्ठ नेता
जसपाले केन्द्रीय अध्यक्षपछिको मर्यादाक्रममा वरिष्ठ नेताको प्रस्ताव गरेको छ। वरिष्ठ नेताले केन्द्रीय विभागको कामहरूको समन्वय, निरिक्षण र अनुगमन गर्ने, पार्टी एकतालाई मजबुत बनाउन पार्टीभित्रका समस्याहरू समाधान गर्न पहल गर्ने, पार्टीका नीति निर्णयहरू कार्यान्वयनमा भूमिका खेल्ने बताइएको छ।
वरिष्ठ नेतापछि, सहध्यक्ष, महासचिव, उपमहासचिव, सचिव र कोषाध्यक्ष रहने गरी व्यवस्थाका लागि प्रस्ताव गरिएको छ।
७० वर्ष उमेरहद, बढीमा दुई कार्यकाल
नेकपा एमालेले ७० वर्षे उमेर हद निलम्बन गरेका बेला जसपाले भने नयाँ प्रस्ताव गरेको छ। ७० वर्ष उमेर भएको व्यक्ति केन्द्रीय समिति, प्रदेश समिति, राष्ट्रिय समिति र जिल्ला समितिमा पदाधिकारी पदमा निर्वाचित हुन वा मनोनित हुन नपाउने भनिएको छ।
पार्टीको निर्वाचित जिल्ला समिति, प्रदेश तथा राष्ट्रिय समिति र केन्द्रीय समितिको पदाधिकारीको हैसियतमा कार्यरत एउटै व्यक्ति, एउटै तह र एउटै पदमा लगातार २ कार्यकाल वा १० वर्ष भन्दा बढी काम गरेको भए सोही पदका लागि पुनः उम्मेदवार हुन नपाउने व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769224076.png)
-1764146706.png)
