काठमाडौं– आर्थिक वर्ष ८०/८१ को बजेटलाई लिएर सत्ताघटक दलहरु नै बजेट पारित हुन नदिने अडानमा देखिएका छन्। बजेट विनियोजन गर्दा प्रधानमन्त्री पुष्पकमल दाहाल प्रचण्डको निर्वाचित भएको गोरखा, कांग्रेस सभापति शेरबहादुर देउवाको गृह जिल्ला डडेलधुरा र अर्थमन्त्री डा प्रकाश शरण महतको गृहजिल्ला नुवाकोटमा मात्र केन्द्रित भएको भन्दै आपत्ति जनाएका छन्।
बजेटलाई आपत्ति जनाउने सत्ताघटक दलमा एकीकृत समाजवादी र जनता समाजवादी रहेका छन्। सत्ताघटककै प्रमुख दलहरु कांग्रेस र माओवादी केन्द्रका सांसदले असन्तुष्टि जनाए पनि यी दुई दलले भने बैठक नै राखेर बजेट पारित हुन नदिने अडान राखेका छन्।
१० सांसद रहेको एकीकृत समाजवादी पार्टीले बिहीबार संसदीय दलको बैठक बसेर यथास्थितिमा बजेट पारित हुन नदिने निर्णय गरेको छ। उक्त पार्टीका सांसद राजेन्द्र पाण्डेले दिएको जानकारी अनुसार असन्तुलित बजेटलाई सन्तुलित नबनाए बजेट पारित गर्न सहयोग नगर्ने अडान अघि सारेको बताए।
‘यथास्थितिमा यो बजेट पारित गर्नुहुन्न भन्ने कुरा साथीहरुले बताउनु भएको छ। बजेटमा देखिएको असन्तुलनलाई सन्तुलित बनाएर मात्र पारित गर्न सकिन्छ,’ सांसद पाण्डेले भने।
यसका लागि एकीकृत समाजवादीले दलका नेता माधव नेपाललाई प्रधानमन्त्री र अर्थमन्त्रीसँग छलफल गरेर बजेटको असन्तुलन मिलाउने जिम्मा दिएको छ। ‘यही विषयलाई लिएर दलको नेतालाई भनेका छौं तपाईंले प्रधानमन्त्री, अर्थमन्त्रीलाई राख्नु होस्,’ सांसद पाण्डेले भने, ‘अर्को पनि सुझाव साथीहरुबाट आएको छ गठबन्धनका सबै दलहरुका बीचमा साझा ढङ्गले छलफल गर्नुहोस् भनेका पनि छौं।’
यस्तै, जनता समाजवादी पार्टी (जसपा)ले बजेट गठबन्धनमा छलफल नगरी एकलौटी रुपमा ल्याइएकाले सच्याउनुपर्ने धारणा राखेको छ। जसपाको केन्द्रीय कार्यकारिणी बैठकपछि आयोजना गरेको पत्रकार सम्मेलनमार्फत् मधेश प्रदेश लगायतका क्षेत्रहरुलाई उपेक्षा गरिएकोले बजेटलाई सच्याइनुपर्ने माग गरेको छ।
‘अहिलेको बजेट एकलौटी ढंगले गठबन्धनमा छलफल नगरी आएको छ। यसले मधेश लगायतका क्षेत्रमा उपेक्षा गरिएको छ। सच्याउनुपर्छ भनिएको छ। यथास्थितिमा बजेट पास गरिँदैन भनेर संसदबाट पनि भनेका छौं। सच्चिएर मात्रै पास हुन्छ,’ उक्त पार्टीका अध्यक्ष उपेन्द्र यादवले भनेका छन्।
उनले बजेटको न्यायोचित वितरण नभएको बताए। चालू योजनालाईसमेत अवरोध हुनेगरी बजेट आएकाले सच्चिएर मात्रै अघि बढ्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786801196.jpg)
-1786602170.png)
