काठमाडौं– सरकारले बिम्स्टेक शिखर सम्मेलनबारे संघीय संसदलाई जानकारी गराएको छ।
प्रधानमन्त्री केपी शर्मा ओलीले मंगबारको प्रतिनिधिसभा बैठकमा विशेष सम्बोधन गर्दै बिम्स्टेक शिखर सम्मेलनबारे सदनलाई जानकारी गराएका हुन्।
नेपालले आयोजना गर्न लागेको बहुपक्षीय आर्थिक प्राविधिक सहयोगका लागि बंगाल खाडीको प्रयास (बिमस्टेक) शिखर सम्मेलनको मुख्य बैठक आगामी बिहीबार र शुक्रबार काठमाडौंमा हुँदैछ। बैठकको तयारीस्वरुप मंगलबार परराष्ट्र सचिवस्तरीय बैठक बसेको छ।
प्रधानमन्त्री ओलीले शिखर सम्मेलनका प्राथमिकता र सम्मेलनमा सहभागी हुन आउने राष्ट्रप्रमुख र सरकार प्रमुखका अन्य कार्यक्रमबारे पनि सदनलाई जानकारी गराएका थिए।
यसपटक बिम्स्टेकले आफ्ना प्राथमिकताका १४ वटा र थप २ गरेर १६ वटा क्षेत्र निर्धारण गरेको उनले जानकारी दिए। उनले संगठनको रुपमा क्षेत्रीय विकासका लागि, क्षेत्रिय सहयोग र पारस्परिकताका लागि प्रभावकारी संगठनका रुपमा लैजाने उद्देश्यले २०१४ मा ढाकामा सचिवालय स्थापना गरिएको उल्लेख गरे।
विमस्टेकको प्राथमिकतामा ब्लु इकोनोमी र माउन्टेन इकोनोमी दुई क्षेत्र थप गरिएको भन्दै प्रधानमन्त्री ओलीले नेपालले गरिबी निवारणको मुद्धाको नेतृत्व गरिरहेको बताए। भारतले ४, थाइल्यान्डले ३, बंगलादेश र म्यानमारले २/२ वटा र श्रीलंका, भुटान र नेपाले एक/एक वटा क्षेत्रको नेतृत्व गरेको उनले स्पष्ट पारे।
प्रधानामन्त्री ओलीले व्यापार, कनेक्टीभिटी, संगठित अपराध विरुद्धको अभियान, वातावरण जस्ता क्षेत्रलाई चौथो शिखर सम्मेलनले विशेष प्राथमिकता दिएको र यी विषयलाई प्रभावकारी कार्यान्वयन गर्न सक्रिय तथा प्रभावकारी सचिवालयको अपेक्षा गरिएको बताए।
उनले शिखर सम्मेलनमा बिम्स्टेकको बडापत्र निर्माण प्रक्रिया पनि अघि बढाइने बताए।
श्रीलंका र म्यानमारका राष्ट्रपतिले नेपालको औपचारिक सद्भाव भ्रमण गर्ने र भारतीय प्रधानमन्त्री नरेन्द्र मोदीले सम्मेलनपछि द्विपक्षीय साझेदारीका कार्यक्रममा पनि सहभागी हुने कार्यक्रम रहको उनले जानकारी गराए।
शिखर सम्मेलनमा सहभागी राष्ट्रप्रमुख र सरकार प्रमुखले राष्ट्रपति विद्यादेवी भण्डारीसँगको भेटघाटको कार्यक्रम पनि राखिएको छ।
प्रधानमन्त्री ओलीले शिखर सम्मेलन गरिबी निवारणलाई मुख्य विषय बनाउँदै कनेक्टिभिटी लगायत विषयमा साझेदारी र सहकार्यलाई अघि बढाउने विषयमा महत्वपूर्ण हुने विश्वास लिएको बताए।
नेपाल, भारत, बंगालादेश, भुटान, म्यानमार, श्रीलंका र थाइल्यान्ड सम्मिलित भएर १९९७ मा सुरु गरिएको यो संगठनको अध्यक्ष राष्ट्रको हैसियतले नेपालले शिखर सम्मेलनको आयोजना गरेको हो। शिखर सम्मेलन २÷ २ वर्षमा हुनुपर्ने भएपनि २० वर्षको अवधिमा चौथो शिखर सम्मेलन हुन लागेको हो।
चौथो शिखर सम्मेलनपछि नेपालले श्रीलंकालाई बिम्स्टेकको अध्यक्षता हस्तान्तरण गर्ने छ। बिमस्टेकको पहिलो सम्मेलन सन् १९९७ मा थाइल्यान्डमा भएको थियो। सन् २००८ मा भारतमा दोश्रो र २०१४ मा म्यानमारमा तेश्रो शिखर सम्मेलन आयोजना भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
