काठमाडौं– सरकारले नेपाल–चीन सीमानास्थित तातोपानी झ्याङ्मोमा सीमा चिन्ह पुन:स्थापनाका लागि अध्ययन टोली गठन गर्ने निर्णय गरेको छ।
मंगलबार साँझ प्रधानमन्त्री निवास बालुवाटरमा प्रधानमन्त्री पुष्पकमल दाहाल प्रचण्डको अध्यक्षतामा बसेको मन्त्रिपरिषद् बैठकले उक्त निर्णय गरेको हो।
बैठकले नेपाल–चीन सीमानाको तातोपानी झ्याङ्मोस्थित सीमा चिन्ह स्तम्भ ५३ (१) लाई यथास्थानमा संयुक्त रुपमा पुनःस्थापनाका लागि टोली गठन गर्ने निर्णय गरेको सरकारका प्रवक्ता एवं सञ्चारमन्त्री रेखा शर्माले बताइन्।
त्यस्तै, बैठकले धुर्मुस सुन्तली फाउन्डेसनले गिरानचौर एकीकृत नमुना बस्ती पुनर्निर्माण तथा पर्यटन प्रवर्द्धन परियोजनाको स्वामित्वमा रहेको घरजग्गा हस्तान्तरण गर्दा लाग्ने कर छुट दिने निर्णय पनि गरेको छ। सरकारले बाढी–पहिरोका घटनाहरुमा ध्यानाकर्षण भएको भन्दै प्रभावकारी रुपमा उद्धार र राहतको काम गर्न निर्देशन गरेको छ।
खासगरी पूर्वी क्षेत्रमा बाढी र पहिरोपछि बेपत्ता भएका नागरिकहरुको खोजी, राहत र पुनःस्थापनाको कामलाई प्रभावकारी ढंगले अघि बढाउने निर्णय मन्त्रिपरिषद्को बैठकले गरेको छ।
पछिल्ला केही दिनमा पाँचथर, ताप्लेजुङलगायतका जिल्लामा गएको बाढी पहिरोको घटनाका कारण पीडित भएका परिवाहरुलाई राहत र पुन:स्थापनाको काम अघि बढाउन गृह मन्त्रालयमार्फत् काम गर्ने निर्णय भएको मन्त्री शर्माले जानकारी दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786801196.jpg)
-1786602170.png)
