प्रधानमन्त्री प्रचण्ड (फाइल तस्बिर)
काठमाडौं– मनसुन भित्रिएसँगै सुरु भएको वर्षाका कारण बाढी र पहिरोले अस्तव्यस्त पूर्वी नेपालको स्थिति बुझ्न प्रधानमन्त्री पुष्पकमल दाहाल प्रचण्ड त्यसतर्फ प्रस्थान गरेका छन्।
प्रधानमन्त्री प्रचण्ड, उपप्रधानमन्त्री तथा गृहमन्त्री नारायणकाजी श्रेष्ठ, भौतिक पूर्वाधार तथा यातायातमन्त्री प्रकाश ज्वालासहितको टोली पूर्वी जिल्लाको स्थिति बुझ्न त्यसतर्फ प्रस्थान गरेको हो। पूर्वी पहाडमा बाढी तथा पहिरोले पुर्याएको क्षति तथा राहत, उद्धार लगायतको अवस्था बुझ्न प्रधानमन्त्री र गृहमन्त्रीसहित सोमबार बिहान प्रस्थान गरेका हुन्।
पछिल्ला केही दिनदेखि ताप्लेजुङ्ग, पाँचथर, संखुवासभामा आएको अवरिल बर्षाका कारण सो क्षेत्रहरुमा ठूलो मात्रामा जन धनको क्षति भएको प्रराम्भिक अनुमान छ। सोही अवस्थालाई बुझ्न प्रधानमन्त्रीको टोली उक्त क्षेत्र प्रस्थान गरेको हो।
बाढी पहिरोले सबैभन्दा धेरै क्षती ताप्लेजुङमा भएको छ। उक्त जिल्लालाई जोड्ने राष्ट्रिय राजमार्गको सम्पर्क टुटेको छ। बाढी पहिरोले ताप्लेजुङ जिल्लाका सिदिङवा र सिरिजंघा गाँउपालिकामा सबैभन्दा धेरै क्षति पुर्याएको छ।
प्रधानमन्त्रीसहितको टोलीमा ताप्लेजुङबाट प्रतिनिधित्व गर्ने सांसद योगेश भट्टराईसहित सांसदहरु बसन्त नेम्वाङ, दिपक खड्का र राजेन्द्र कार्की (कोशी प्रदेश सभा सदस्य) पनि गएका छन्।
साथै नेपाली सेनाका प्रधानसेनापति, गृह मन्त्रालयका विपत् हेर्ने प्राविधिक इन्जिनियर र प्रधानमन्त्री कार्यालयका विपत् हेर्ने अधिकृत पनि टोलीमा रहेका प्रधानमन्त्री प्रचण्डको सचिवालयले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
