काठमाडौं– माओवादी केन्द्रसहित ४ दलले सोमबार समाजवादी मोर्चा घोषणा गर्ने सहमति गरेका छन्। प्रधानमन्त्रीको सरकारी निवास बालुवाटारमा आइतबार बसेको नेताहरुको बैठकले सोमबार मोर्चा घोषणा गर्ने सहमति गरेको हो।
आइतबार बिहान प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधव कुमार नेपाल, जनता समाजवादी पार्टीका अध्यक्ष उपेन्द्र यादव र नेकपाका महासचिव नेत्रबिक्रम चन्दबीच बालुवाटारमा मोर्चा घोषणाबारे छलफल भएको थियो।
नेताहरुले सोमबार मोर्चा घोषणा गर्ने सहमति गरेको जसपाका नेता राजेन्द्र श्रेष्ठले जानकारी दिए। श्रेष्ठका अनुसार सुरुमा नीतिगत सहमति मात्र घोषणा गर्ने तयारी छ।
मोर्चामा पूर्वप्रधानमन्त्री डा बाबुराम भट्टराईलाई समेट्ने भन्दै घोषणा मिति केही समयलाई सारिएको थियो। भट्टराईले प्रधानमन्त्री प्रचण्डलाई भेटेर ‘हतार गर्न नहुने’ भनेपछि यसअघि शुकरबारलाई तय भएको घोषणा कार्यक्रम सरेको थियो।
तर अहिलेलाई भने भट्टराईसँग छलफल जारी राखेर मोर्चा घोषणा गर्ने सहमति भएको जसपा नेता श्रेष्ठले जानकारी दिए।
नेताहरूबीच भएको सहमतिअनुसार, मोर्चाको नेतृत्व आलोपालो गर्ने तय भएको छ। तत्काललाई केन्द्रीय मोर्चा घोषणा गर्ने र आवश्यकताका आधारमा तल्लो तहसम्म संरचना बनाउने श्रेष्ठले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
