काठमाडौं– प्रतिनिधि सभाको आइतबारको बैठकमा संस्कृति, पर्यटन तथा नागरिक उड्डयन मन्त्रालयको विनियोजन विधेयक, २०८० माथिको छलफललाई कार्यसूचीबाट हटाइएको छ।
सो मन्त्रालयबाट मन्त्रालयगत योजना समावेश भएको पुस्तकमा प्रदेशहरुको पुरानै नाम (प्रदेश १, प्रदेश २ … प्रदेश ७) उल्लेख भएको भन्दै एमाले सांसद महेश बर्तौलाले विरोध जनाएका थिए।
‘प्रदेश सभाले दुई तिहाइबाट आफ्नो प्रदेशको नामाकरण गरिसकेको छ। त्यसलाई संघीय सरकार, पर्यटन मन्त्रालयले अस्वीकार गरेर जुन ढंगल प्रदेश १ मा यति विनियोजन गरिएको छ, २ मा यति गरिएको छ भन्ने कुरा उल्लेख गरिएको छ। यो प्रदेश सभाको विशेषाधिकारमाथि हनन हो,’ बर्तौलाको भनाइ थियो।
उनले देशले नचिन्ने प्रदेशहरुमा छुट्याइएको बजेटहरुमा छलफल अगाडि बढ्न नसक्ने बताएका थिए। उनले मन्त्रालयले ५, १०, १५ मिनेटमा त्रुटि भएको हो भनेर सच्याएर ल्याउँछ भने त्यसमाथिको छलफलमा जान सकिने नत्र नसकिने बताएका थिए। ‘यसलाई पुनः प्रकाशन गरी संविधान र कानुनले चिन्ने र प्रदेश सभाले पारित गरेको आएमा मात्रै छलफल अगाडि बढाइने छ। नत्र कार्यसूचीबाट हटाइयोस्,’ उनले भने।
त्यसपछि संस्कृति, पर्यटन तथा नागरिक उड्डयन मन्त्री सुदन किराँतीले त्यसलाई सुधारेर पुनः ल्याउने बताएका थिए।
‘यो विनियोजन विधेयकमाथिको छलफलको सिलसिलामा संस्कृति पर्यटन तथा नागरिक उड्डयन मन्त्रालयको बजेट विनियोजनको सन्दर्भमा हाम्रो विभागको ११ देखि १८ पेजसम्ममा प्रदेशको नाम उल्लेख नभइ अंकमा लेखिन गएछ। त्यसलाई हामी सुधारेर सदन र सदस्यहरुको हातमा फेरि ल्याउने छौँ’, उनले भने।
मन्त्रीको जवाफपछि सभामुख देवराज घिमिरेले मन्त्रीले सच्याएर ल्याउने कुराको वचनबद्धता दिइसकेको र त्यसलाई छापेर ल्याउन केही समय लाग्ने भएकाले कार्यसूचीलाई अगाडि बढाउन आग्रह गरेका थिए। तर बर्तौलाले पुनः विरोध जनाए। उनले यो गम्भीर विषय भएको बताए।
‘प्रदेश १ मानेर छलफल गर्न मिल्छ? कुश राखेर छलफल गरेको जस्तो विषय हो? प्रदेश सभाले दुई तिहाइबाट पास गरेको विषयलाई संघीय सरकारले अस्वीकार गर्ने? यसो हो भनेर छलफल गर्न मिल्छ?,’ बर्तौलाको भनाइ थियो, ‘सभामुखको आसनबाट पनि यसो भन्न शोभा दिँदैन। पास गरिएको नामाकरण उल्लेख भएपछि मात्रै छलफल गर्ने कुरा अवगत गराउन चाहन्छु।’
त्यसपछि सभामुखले सो मन्त्रालयको विनियोजन विधेयकमाथिको छलफललाई आइतबारको कार्यसूचीबाट हटाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781922122.jpg)
-1790561542.webp)
-1786602170.png)
