काठमाडौं- नेपाली नागरिकलाई भुटानी शरणार्थी बनाएर अमेरिका लैजाने भन्दै ठगी भएको प्रकरणमा पक्राउ परेकामध्ये २ जनालाई शुक्रबार जिल्ला अदालत काठमाडौंले धरौटीमा रिहा गर्न आदेश दियो। उनीहरु दुई जना थिए, एक नेपाल प्रहरीकै सई लक्ष्मी महर्जन र अर्का थिए टंक गुरुङ।
महर्जनलाई ५ लाख र गुरुङलाई १० लाख धरौटीमा रिहा गर्न आदेश दिएपछि उनीहरु रिहा हुने बाटो खुल्यो। न्यायाधीश प्रेमराज न्यौपानेको यो आदेशपछि ८३ औं दिनमा घर फर्किँदै छन् गुरुङ। थुनछेक बहसको अन्तिम दिन शुक्रबार पनि उनी सधैंजस्तो अदालतमै उपस्थित थिए। आफू पक्राउ पर्दादेखि धरौटीमा माग हुँदासम्मको विवरण नेपाल लाइभसँग गुरुङले यसरी पोखे:
मलाई गत चैत १२ गते नै काठमाडौं उपत्यका अपराध अनुसन्धान कार्यालयले पक्राउ गर्यो। ललितपुरमा रेष्टुरेन्ट चलाउँदै आएको थिएँ।
पहिलो पटक प्रहरीले लिएर जाँदा म छक्क परेको थिएँ। केही सामान्य सोधपुछ होला भन्ने लागेको थियो। तर ८३ दिनसम्म प्रहरी हिरासतमा बस्नुपर्यो।
जीवनमा पहिलो पटक प्रहरी हिरासत पुगेँ। यो भुटानी शरणार्थी प्रकरणबारे त मलाई केही थाहै थिएन। यो प्रकरणमा पक्राउ परेका केही व्यक्तिहरु चिन्थेँ। उनीहरु मेरो रेष्टुरेन्टमा खाना, खाजा खान आउँथे। रेष्टुरेन्टमा त हरेक किसिमका मान्छेहरु आउँछन्। को कस्तो भन्ने कसरी थाहा पाउनु।
पछि त ममाथि नक्कली भुटानी शरणार्थी प्रकरणका आरोपीहरुलाई खाना खुवाएको घरमा राखेको, सेल्टर दिएकोसम्म आरोप लाग्यो। मेरै घरमा भाडामा बस्ने केशव दुलाल। उनैलाई घरमै राखेर यो प्रकरणमा सहयोग गरेको आरोप लगाइयो। अब त कोठा भाडामा मान्छे राख्दा पनि धेरै कुरा विचार गर्नुपर्ने रहेछ। जीवनमा ठूलो पाठ सिकियो। तर मलाई यो प्रकरणबारे केही थाहै थिएन।
मलाई लगाइएको अभियोग र पछि ममाथि केही प्रमाणहरु नभेटिएपछि प्रहरी अधिकारीले स्वयम तपाईंको खासै केही देखिएको छैन। चिन्ता नलिनुस् भनेका थिए।
अदालतमा पुगेपछि भने न्याय पाउँछु भन्ने ठूलो आस थियो। मलाई प्रहरी वृत्त जनसेवाको हिरासतमा राखिएको थियो। त्यहाँ राति पनि पक्राउ परेका मान्छेहरु आइरहने, हल्ला हुने भएकाले खासै निदाउन सकेको थिइनँ। हिजो राति पनि सधैंकै जस्तो होहल्ला भइरह्यो। त्यही पनि निदाउने प्रयास गरेँ। निदाउँदा सपनामा दूध पिएको देखेको थिए। त्यसपछि ब्युँझिहालेछु। हल्लाले सुत्नै नसकिने।
भगवान छन् भने मलाई बिना धरौटी छुटाउँछ होला जस्तो लागेको थियो। तर धरौटीमा भए पनि रिहा हुने बाटो खुल्यो।
पक्राउ परेको ८३औं दिनमा घर जाने भएपछि केही टंक गुरुङले धरौटीका लागि १० लाख जुगाड गर्न फोन लगाए। केही सयममा रकम लिएर अदालत आउने जवाफ आएपछि उनी घर जाने आशामा थिए। उता पुर्पक्षमा जान लागेका अन्यले हात हल्लाउँदै उनलाई बिदा दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790561542.webp)
-1786602170.png)
