प्रधानन्यायाधीशमा अनुमोदित कार्कीले १७ दिन मात्रै मुद्दा हेर्न पाउने

राजनीति

नेपाल लाइभ शुक्रबार, असार १, २०८० १३:०६

काठमाडौं– सर्वोच्च अदालतको प्रधानन्यायाधीशको रुपमा हरिकृष्ण कार्कीको नाम संसदीय सुनुवाइ समितिबाट अनुमोदन भएको छ। संसदिय सुनुवाइ विशेष समितिले शुक्रबार कार्कीको नाम सर्वसम्मत रुपमा अनुमोदन गरेको हो।

सुनुवाइ समितिमा कार्कीलाई सांसदहरुले उजुरी परेका विषय र अन्य विषयहरु मिलाएर प्रश्न गरेका थिए। सांसदहरुका सबै प्रश्नको जवाफ उनले आत्मविश्वास र निडर भएर दिएका थिए।

कार्कीले सांसदहरुलाई आफूले सर्वोच्चमा नियुक्त भएदेखि कामु प्रधानन्यायाधीशको जिम्मेवारी सम्हाल्दासम्म कुनै पनि गल्ती नगरेको भनेर जवाफ दिए। उनले दिएको जवाफमा सन्तुष्ट हुँदै समितिले उनको नाम सर्वसम्वत रुपमा अनुमोदन गरेको छ। अनुमोदन भएसँगै उनी सर्वोच्च अदालतको ३०औं प्रधानन्यायाधीशको रुपमा जिम्मेबारी सम्हाल्ने छन्।

शुक्रबार सपथ लिएर कार्यभार सम्हालेमा उनीसँग २० दिनको समय हुने छ। तर त्यसमा शनिबार कटाउदाँ उनले १७ दिनमात्र अदालतमा उपस्थित भएर मुद्दाको सुनुवाइमा बस्न पाउनेछन्।

संवैधानिक परिषद्ले प्रधानन्यायाधीशका लागि सिफारिस गरेको ४०औं दिनमा कार्की प्रधानन्यायाधीशको रुपमा अनुमोदन भएका छन्। राष्ट्रपति रामचन्द्र पौडेलले उनलाई नियुक्ति दिँदै शपथ खुवाउने छन्। हालसम्म राष्ट्रपति कार्यालयमा अनुमोदन गरेको पत्र पुगेको छैन।

राष्ट्रपति कार्यालयले शपथका लागि ३ घण्टा लाग्ने जनाएको छ। ‘शपथको तयारीका लागि ३ घण्टाको समय लाग्छ। पत्र आयो भने तयारी सुरु हुने हो। पत्र कतिबेला आउँछ भनेर हामी प्रतिक्षामा छौं,’ राष्ट्रपति कार्यालयकी प्रवक्ता शैलजा रेग्मी भट्टराईले भनिन्।

कार्की नेपालको न्यायिक इतिहासमै सबैभन्दा छोटो कार्यकालका लागि प्रधानन्यायाधीशको जिम्मेबारी सम्हाल्दै छन्। कार्कीले प्रधानन्यायाधीशका रुपमा जम्मा ५० दिन समय पाउने छन्। कार्कीको जन्ममिति २०१५ साउन २० भएकाले उनी २०८० साउन २० गतेबाट ६५ वर्षे उमेर हदका कारण अनिवार्य अवकाशमा जाने छन्।

प्रधानन्यायाधीश वा न्यायाधीशले अवकाश पाउनुभन्दा १ महिना अघि कुनै पनि मुद्दा सुनुवाइ नगर्ने गरि बिदामा बस्ने अभ्यास रहेको छ। यसरी हेर्दा उनले असार २० गतेदेखि सर्वोच्चमा बिदा लिएर बस्ने छन्। उनको स्थानमा विश्वभरप्रसाद श्रेष्ठको नाम सिफारिस हुनुपर्ने छ। प्रधानन्यायाधीशका रुपमा कार्की ५० दिन पदमा रहने भए पनि इजलासमा भने १७ दिनमात्र बिताउन पाउनेछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

मिनी ट्रक दुर्घटनामा एक जनाको मृत्यु

आजको मौसमः तराईमा हुस्सु, पहाडमा सामान्यतया सफा रहने

गायिका मङ्गेशकरको स्वर रहेको ‘बाचुन्जेलीलाई’ सार्वजनिक