काठमाडौं– संघीय संसद् सचिवालयका कर्मचारीहरुले आफूहरुको श्रम शोषण गरिएको भन्दै विरोध जनाएका छन्।
कार्यालय समय बाहेक बिहान ८ बजेदेखि समितिहरुका बैठक र दुवै सभा (प्रतिनिधि सभा र राष्ट्रिय सभा)का बैठक राति १० बजेसम्म पनि निरन्तर सञ्चालन गर्दै आए पनि सोअनुसार अतिरिक्त सुविधा नदिइएको कर्मचारीहरुको भनाइ छ।
कर्मचारीको श्रम शोषणप्रति सांकेतिक विरोधस्वरुप शुक्रबार बिहानका लागि निर्धारण गरिएका समितिका बैठकहरु ३० मिनेट ढिला सञ्चालन गरिएको संघीय संसद सचिवालय कर्मचारी युनियनका अध्यक्ष गोबिन्द प्रसाद बेल्बासेले जानकारी दिएका छन्।
‘सचिवालयमा कार्यरत सम्पूर्ण कर्मचारीहरुको अहोरात्र खटाइलाई संसद् सचिवालय सञ्चालन तथा व्यवस्थापन समिति र अर्थ मन्त्रालयले कमजोरीका रुपमा लिएर गम्भीर श्रम शोषण भइरहेको छ,’ युनियनका अध्यक्ष बेल्बासेले भने, ‘आज (शुक्रबार)को संसदीय समितिको बैठक सांकेतिक विरोधका रुपमा ३० मिनेटपछि सञ्चालन गर्ने भन्ने भएको हो।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।