कोशी प्रदेशका मुख्यमन्त्री हिक्मत कार्की (फाइल तस्बिर)
काठमाडौं– मधेस प्रदेशमा नेकपा एमालेले जनता समाजवादी पार्टी (जसपा)का मुख्यमन्त्री सरोजकुमार यादवलाई विश्वासको मत दिएको छ। एमालेकै सहयोगबाट मुख्यमन्त्री बनेका यादव फेरि एमालेको मत पाएर थप शक्तिशाली बनेका छन्। कोशी प्रदेशमा अल्पमतमा पुगेको एमालेले त्यसका लागि मधेस रणनीति अख्तियार गरेको हो।
मंगलबार १०७ सदस्य रहेको मधेस प्रदेश सभामा उपस्थित १०३ जनाले नै विश्वाको मतको पक्षमा भोट दिएका छन्। मधेस प्रदेशमा नेकपा एमाले, नेपाली कांग्रेस, जनता समाजवादी पार्टी (जसपा), जनमत पार्टी, माओवादी केन्द्र, लोकतान्त्रिक समाजवादी पार्टी (लोसपा) नेपाल, संघीय समाजवादी पार्टी, राष्ट्रिय प्रजातन्त्र पार्टी र नागरिक उन्मुक्ति पार्टी रहेका छन्। प्रदेश सभामा एमालेका २४, कांग्रेस २२, जसपा १८, जनमत १३, लोसपा र माओवादीका ९-९, एकीकृत समाजवादीका ७ सांसद छन्। नेपाल संघीय समाजवादी पार्टी, राष्ट्रिय प्रजातन्त्र पार्टी र नागरिक उन्मुक्ति पार्टीका १-१ जना सांसद छन्।
सरकारबाट बाहिरिएको एमालेले बाहिरबाटै समर्थन गरेको छ। एमालेको उक्त समर्थन प्रदेशमा अस्थिरता रोक्न रहेको एमाले महासचिव शंकर पोखरेलले बताएका छन्।
विश्वासको मत दिएपछि पार्टीको मत राख्दै सामाजिक सञ्जालमा लेखेका छन्, ‘राजनीतिक अस्थिरताका विरुद्धमा नेकपा(एमाले)ले मधेस प्रदेश सरकारलाई विश्वासको मत दिएर बाँकी प्रदेशलाई पनि अस्थिरतातर्फ जानवाट रोक्न अन्य दलहरुले पनि यस्तै रचनात्मक भूमिका खेल्ने अपेक्षा राखेको छ।’ उनले यतिबेलाको मुलुकको विकास र समृद्धिका लागि राजनीतिमा अस्थिरता र अराजकता गम्भीर चुनौती बन्ने देखिएको बताएका छन्।
सार्वजनिक रुपमा एमालेले यस्तो स्पष्टोक्ति दिए पनि अन्तर्य भने कोशी प्रदेशमा सरकार जोगाउनु रहेको छ। एमालेकै नेतृत्वमा सरकार भए पनि केही जेठ १७ गते जसपा सरकारबाट बाहिरिएको छ। जसपापछि माओवादी केन्द्र पनि बाहिरिएपछि एमाले सरकार अल्पमतमा परेको छ।
उक्त प्रदेशमा नेकपा एमाले सवैभन्दा ठूलो दल हो। एमालेका ४० सांसद् छन्। यसैगरी ६ सांसद् भएको राष्ट्रिय प्रजातन्त्र पार्टी एमालेको साथमा हुँदा ४६ पुग्छ। यसैगरी कांग्रेसका २९, माओवादी केन्द्रका १३, नेकपा एकीकृत समाजवादीका ४ गरी विपक्षमा समेत ४६ सांसद् नै छन्। एक सांसद रहेको जसपाले विपक्षीलाई सघाउँदा ४७ सांसद पुग्छन्।
जसपाबाट एकमात्र सांसद रहेकी निर्मला लिम्बु स्वास्थ्यमन्त्री थिइन्। कोशी नामकरणको विरोधमा भइरहेको पहिचानपक्षधरको आन्दोलनमा समर्थन गरिरहेको जसपाले मुख्यमन्त्री हिक्मत कार्की नेतृत्वक सरकारबाट परिणाम ननिस्किने भन्दै बाहिरिएको हो।
उक्त पार्टीमाथि सरकारमा पनि बस्ने, आन्दोलनमा पनि समर्थन गर्ने दोहोरो चरित्र देखाएको आरोप समेत थियो। सदनमा नामकरणका बेला मन्त्री लिम्बूले विपक्षमा हस्ताक्षर गरेकी थिइनन्। त्यसकारण पार्टी नेतृत्व उनीसँग असन्तुष्ट रहेको थियो।
जसपा सरकारबाट बाहिरिए पनि समर्थन जुटाउने रणनीतिअन्तर्गत मधेसमा एमालेले विश्वासको मत दिएको छ। जसले संवादको वातावरण निर्माण हुने एमाले नेताहरु बताउँछन्। जसपाले एमाले नेतृत्वको सरकारलाई समर्थन गर्ने सम्भावना कायम रहेको प्रमुख सचेतक रेवतीरमण भण्डारीले बताए।
भण्डारीका अनुसार मुख्यमन्त्री कार्कीले असार १५ गते विश्वासको मत लिने तयारी गरेका छन्। विश्वासको मत लिनुपर्ने अवस्थामा एमालेसँग राप्रपाका ६ र आफ्ना ४० गरी ४६ सांसद् हुनेछन्। जसपाले विपक्षीलाई सघाउँदा मत संख्या ४६ नै पुग्नेछ। मत बराबर भएको अवस्थामा माओवादीबाट सभामुख बनेका बाबुराम गौतमले निर्णायक मत दिनेछन्। मुख्यमन्त्री कार्कीको सरकार ढल्नेछ। जसपाले एमालेलाई समर्थन दिएमा भने ४७ सांसदसहित बहुमत पुग्नेछ। विपक्षमा जम्मा ४५ मत पुग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914069.png)
-1764146706.png)
