काठमाडौं– नक्कली भुटानी शरणार्थी प्रकरणमा पूर्वगृहमन्त्री बालकृष्ण खाणको बहस हेर्दा हेर्दै सकिएको छ।
जिल्ला अदालतका न्यायाधीश प्रेमप्रसाद न्यौपानेको इजलासमा चलिरहेको बहसमा खाणका कानुन व्यवसायीहरुले बहस नसक्याएपछि बुधबारलाई हेर्दा हेर्दै राखिएको हो।
यसअघि इजलासले मंगलबार सबैको बहस सक्दै बुधबार जवाफी बहस गर्ने समय निर्धारण गरेको थियो। गत आइतबार नै न्यायाधीश न्यौपानेले सरकारी पक्षलाई तीन दिन र प्रतिवादीहरुलाई ६ दिन समय तोकेका थिए।
तोकिएको समय समाप्त भएपछि खाणका कानुन व्यवसायी धेरै हुँदा अन्य केही प्रतिवादीको बहस नै बाँकी रहेको छ। मंगलबार खाणको बचाउ गर्दै वरिष्ठ अधिवक्ता शेरबहादुर केसी, महादेव यादव, प्रेमबहादुर खड्का, हरिहर दाहालले बहस गरे।
त्यस्तै अधिवक्ताहरु एकराज पोखरेल, अजय शंकर झा, निरसिंह कुमार खत्री र मनिराज उपाध्यायले बहस गरे। वरिष्ठ अधिवक्ता एवं नेपाल बार एशोसियसनका तीन पूर्व अध्यक्षले बहस गरेपछि न्यायाधीश न्यौपानेले एउटै कुरा बहसमा पटक–पटक दोहोरिएको भन्दै आफ्नो कुरा नदोहोर्याई राख्न आग्रह गरे।
‘बहसमा विद्धानहरुको धेरै कुरा दोहोरियो। लामो समयसम्म प्रतिवादीका तर्फबाट मात्र बहस गरिरहँदा अदालत निरिह जस्तो भयो,’ न्यायाधीश न्यौपानेले भने, ‘भोलि अन्तिम समय हो, तपाईंहरुको विद्वता म भोलि हेर्छु।’
न्यायाधीशले यति भनेपछि एकैछिन इजलासमा हाँसो फैलियो। न्यायाधीश न्यौपानेले थप्दै भने, ‘तपाईंहरुलाई समय दिइराख्दा अदालत निरिह देखियो? अन्य प्रतिवादीहरुको बहस बाँकी नै छ। धेरै दिन भयो यही विषयमा अदालत अल्झेको। सरकारी पक्षको प्रतिउत्तर जवाफ पनि सुन्नुपर्ने छ।’
न्यायाधीशको कुरा सुनेपछि खाणका कानुन व्यवसायीहरुले बुधबार १२ बजेसम्मको समय उपलब्ध गराउन र आफूहरुले उक्त अवधिमा बहस सक्ने प्रस्ताव गरे। उनीहरुको प्रस्ताव स्वीकार गर्दै न्यायाधीश न्यौपानेले विद्वता हेर्ने टिप्पणी गरे। बुधबार पूर्वगृहमन्त्री खाणको बहस सकिएमा बाँकी प्रतिवादीको पनि बहस सक्दै बिहीबार सरकारी पक्षको जवाफी बहस राख्ने अदालतको तयारी छ।
बिहीबार सबै पक्षको बहस सकिएपछि थुनछेक आदेश इजलासले सुनाउने छ। इजलासले उनीहरुलाई धरौटीमा रिहा गर्ने कि थुनामा पठाउने आदेश अन्तिम बहसकै दिन हुने छ। अदालतले थुनामा पठाएमा उनीहरु त्योविरुद्ध उच्च अदालत हुँदै सर्वोच्चसम्म जान पाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786439498.png)
-1764146706.png)
-1786184812.png)
