काठमाडौं- नेपाली कांग्रेसका महामन्त्री गगन थापाले पार्टी सभापति शेरबहादुर देउवाप्रति लक्षित गर्दै छैटौं पटक प्रधानमन्त्री बन्ने लालसामा पुनर्विचार गर्न भनेका छन्। मोरङमा आयोजित एक कार्यक्रमलाई सम्बोधन गर्दै उनले आफ्नो पार्टीको नेता प्रधानमन्त्री बन्दा आफूहरु खुसी हुने बताउँदै जनतातर्फ हेर्न भनेका हुन्।
थापाले भने, 'मैले पार्टी सभापति रहेकै कार्यक्रममा समेत भनेको छु- एक पटक सोचौं। तपाईं पाँच पटक प्रधानमन्त्री भइसक्नुभयो, छैटौं पटक हुँदा म त खुसी हुन्छु। तल बसेको नागरिकले ताली बजाउँछ कि बजाउँदैन? उत्साहित हुन्छ कि हुँदैन?'
आफूले कुनै स्थान लिँदै गर्दा त्यसबाट आम मान्छे उत्साहित हुने वा नहुने कुरामा समेत ध्यान दिनुपर्ने उनले बताए। आफूप्रति भरोसा रहे/नरहेको समेत जान्नुपर्ने थापाले उल्लेख गरे।
हरेक नेताको कालखण्ड हुने उल्लेख गर्दै प्रत्येकले आफ्नो बारेमा विचार गर्ने बेला आएको उनको भनाइ छ। अहिले कार्यकर्ताले नेतृत्वको अनुहारको दाग नदेखेर ऐना पुछ्न हिँडिरहेको उनले उल्लेख गरे। त्यसो गर्दा दाग नमेटिने भन्दै थापाले थपे, 'कार्यकर्ताले नेताको अनुहारको दाग देख्दैनौं। हामी ऐना पुछ्न जान्छौं। ऐना पुछेर दाग मेटिन्न। साबुन छ भनेर साबुनपानीले धुनुपर्छ। त्यसरी पनि भएन भने नेता फेर्नुपर्छ। हाम्रो सन्दर्भमा पनि यही हो।'
कांग्रेसमा विधानको शासन नभएको बताउँदै केही कुरा सच्याउनुपर्ने उनले बताए। केन्द्रीय समिति बैठक बस्न नसकेको उल्लेख गर्दै सभापतिले नै बोलाउनुपर्ने विधानमा रहेको बताए। त्यसका लागि पनि आफूसँग हल रहेको उनले उल्लेख गरे।
'पार्टीको बैठक बसेको छैन। मैले बोलाएर बैठक बस्दैन। मैले बोलाएर बस्ने भए हरेक महिनामा बैठक राख्थें। पार्टीको बैठक सभापतिले बोलाउनुपर्छ। मैले बोलाएँ भने विभाजनतर्फ जान्छ। म एउटा बैठक कुरिरहेको छु। कुन महिना बस्ने भन्ने त्यो बैठकले नै कार्यतालिका पास गर्छ,' उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
