न्यायाधीश र बारका पूर्व अध्यक्षबीच इजलासमै चल्यो सवाल जवाफ

राजनीति

नक्कली भुटानी शरणार्थी प्रकरण:न्यायाधीश र बारका पूर्व अध्यक्षबीच इजलासमै चल्यो सवाल जवाफ

नेपाल लाइभ मंगलबार, जेठ ३०, २०८० १४:४५

काठमाडौं– नक्कली शरणार्थी प्रकरणमा पूर्व गृहमन्त्री बालकृष्ण खाणको बहस चलिरहँदा वरिष्ठ अधिवक्ता एवं नेपाल बार एशोसियसनका पूर्व अध्यक्ष शेरबहादुर केसीकाबीचमा केही बेर सवाल जवाफ नै भएको छ।

जिल्ला न्यायाधीश प्रेमप्रसाद न्यौपानेको इजलासमा गत आइतबारदेखि बहस चलिरहेको छ। सुरुमा सरकारी वकिलहरुले तीन दिन बहस गरेका थिए। सरकारी पक्षको बहसपछि बुधबारबाट प्रतिवादीका कानुन व्यवसायीहरुले बहसको समय पाएका थिए।

मंगलबारसम्म आइपुग्दा ६ जना प्रतिवादीहरुको बहस बाँकी रहेको थियो। पूर्वगृहमन्त्री बालकृष्ण खाणको पालो पनि मंगलबार आएको छ। खाणका पक्षबाट बहस गर्नका लागि ३० भन्दा धेरै कानुन व्यवासायीले नाम लेखाएका छन्।

खाणको पक्षमा बहसका लागि वकालतनामा लेखाएकामध्ये एक नेपाल बार एशोसियनका पूर्व अध्यक्ष शेरबहादुर केसी उभिए। वरिष्ठ अधिवक्ता रहेका केसीले खाणलाई पक्राउ गरिएको विषय नै गलत भएको भनि प्रश्न उठाउन सुरु गरे।

उनले खाण हाईप्रोफाइल व्यक्ति भएको र सार्वजनिक सञ्चार माध्यमका लागि पनि बिकाउ समाचार हुने देखेपछि पक्राउ गरिएको आरोप इजलासमा लगाए। केसीले मूल विषयभन्दा खाणको प्रशंसा र पक्राउ गर्ने कार्यको विरोधमा मात्र समय खर्चन थालेपछि न्यायाधीश न्यौपानेले रोके। यही क्रममा न्यायाधीश र केसीकाबीचमा केहीबेर सवाल जवाफ नै भयो।

शेरबहादुर केसी : बालकृष्ण खाण पूर्वगृहमन्त्री र नेपाली कांग्रेसका उच्च तहका नेता हुन्। उनी लामो राजनीतिक भविष्य भएका नेता हुन्। यही देखेर मीडियादेखि राज्य सबै मिलेर पक्राउ गर्नेदेखि समाचार लेख्नेसम्मका कार्य भयो। यो विशुद्ध फसाउने, उनलाई सक्ने कार्यमात्र हो।

उनलाई रोक्दै न्यायाधीश न्यौपानेले प्रश्न गरे।
प्रेमप्रकाश न्यौपाने : हाइप्रोफाइलले अपराध गर्दैनन्? अपराध गरेको भनि उजुरी परेको छ। उजुरी परेपछि राज्य नलागे के लाग्छ त वरिष्ठ ज्यू?

न्यायाधीशको कडा प्रश्नपछि केसीले अलि नरम हुँदै भने, ‘श्रीमान् अनुसन्धान गर्नै हुँदैन भनेको हैन। तर नियत राखेर फसाउने गरि र सञ्चार माध्यमको समाचार विक्ने कुरा हेरेर पक्राउ गरिएको देखियो।’

उनले थप प्रष्ट पार्न थाले। खाणविरुद्ध जाहेरीमा केही नभएको र पार्टी सरकारमा रहेका कारण पनि उनीमाथि प्रहार भएको दाबी गरे। ‘निर्वतमान गृहमन्त्रीलाई ठूलो बनाउने र मिडियालाई हाइलाइट गराउन र यो प्रकरणलाई ठूलो बनाउन उनलाई पक्राउ गरेको देखियो’, उनले भने, ‘तत्कालीन गृहमन्त्री खाणलाई फसाउन सचिव टेकनारायण पाण्डेलाई मेट्रोमा लगेर केरकार गरिएको छ। सचिवको काम फाइल राख्ने होइन। समग्र जिम्मा लिने हो। किन उनलाई यस्तो गरियो?’

उनले नक्कली भुटानी शरणार्थी प्रकरणको फाइल उठाउने दुई जना कर्मचारीलाई चै उन्मुक्ति दिइएको र सचिव तथा मन्त्रीलाई मात्र मुद्दा दायर गरेको दाबी पेस गरे।

गृहमन्त्रालयका कर्मचाारी फडिन्द्रमणि पोखरेल र सागरमणि पाठकले फाइल बनाएकाले उनीहरुमाथि मुद्दा दायर हुनुपर्नेमा खाण र पाण्डेलाइ अभियुक्त बनाउने कार्य त्रुटिपूर्ण भएको उनले दाबी गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

रसुवाका तीनवटा आयोजनाबाट राष्ट्रिय प्रसारण प्रणालीमा थपियो १६८ मेगावाट विद्युत

सार्क मुलुकका पर्यटकको आकर्षण बन्दै ‘हट एयर बेलुन’

गैँडाको आक्रमणबाट आलु रोप्न गएका वृद्धको मृत्यु