काठमाडौं– नक्कली भुटानी शरणार्थी प्रकरणमा जिल्ला अदालत काठमाडौंमा बहस चलिरहँदा पूर्व गृहमन्त्री रामबहादुर थापा बादल, अख्तियार दुरुपयोग अनुसन्धान आयोगका प्रमुख प्रेमकुमार राई र प्रमुख प्रतिपक्ष दलका नेता केपी शर्मा ओलीका पीए राजेश बज्राचार्यको नाम उठेको छ।
न्यायाधीश प्रेमप्रसाद न्यौपानेको इजलासमा बहस चलिरहँदा पक्राउ परेका बहालवाला सचिव टेकनारायण पाण्डेको पक्षमा बहस गर्न उभिएका पूर्व महान्यायाधिवक्ता एवं वरिष्ठ अधिवक्ता रमण श्रेष्ठले उनीहरुको विषयमा इजलाससमा प्रश्न उठाएका हुन्। उनले सचिव पाण्डेसहितका प्रतिवादीहरुको नाम जाहेरीकर्ता र पक्राउ परेका व्यक्तिहरुले लिने बित्तिकै पक्राउ गर्ने तर उनीहरुलाई किन गरिएन भनि प्रश्न गरे।
‘यो प्रकरणमा अभियोगपत्रमा भएको बयान हेर्दा पूर्व गृहमन्त्री रामबहादुर थापा बादल, सांसद नैनकला थापा,अख्तियार प्रमुख प्रेम राई र राजेश बज्राचार्यको नाम लिएको भेटियो,’ श्रेष्ठले प्रश्न गरे, ‘तर उनीहरुलाई किन पक्राउ गरेर बयानसम्म गराइएन, प्रतिवादी पनि नबनाई उन्मुक्ति दिइयो।’
श्रेष्ठले विचौलियाहरुले उनीहरुलाई पनि रकम बुझाएको भनि नाम लिएकाले उनीहरुलाई पनि पक्राउ गर्नुपर्नेमा किन नगरिएको भन्दै प्रश्न गरे। उनले यदि बयानकै आधारमा अभियोगपत्र दायर हुने र पक्राउ गर्ने हो भने उनीहरुलाई पनि अनुसन्धानको दायरामा ल्याउनुपर्ने तर्क गरे।
‘यसबाट नै यो अनुसन्धान पूर्वाग्रही छ भन्ने देखिन्छ,’ उनले भने, ‘एकै व्यक्तिले नाम लिएका केही व्यक्तिहरुमाथि सोधपुछसमेत नहुने, अरुलाई भने रातारात पक्राउ गरेर अभियोगपत्र कसरी दर्ता गर्न मिल्छ?’। उक्त प्रकरणमा नाम लिइएका सबै व्यक्तिमाथि अनुसन्धान गर्नुपर्ने दायित्व अनुसन्धान टोलीको भए पनि कसैलाई बचाउ गर्ने र कसैलाई फसाउने कार्य भएको दाबी गरे।
उनले सचिव पाण्डेको हकमा गलत नियत नै राखेर अनुसन्धान गरेको दाबी गरे। उनले २०७५ कात्तिक ६ मा नक्कली शरणार्थीको सूची सम्बन्धी प्रस्ताव पेस भएको र उक्त समयमा पाण्डे गृह मन्त्रालयमै नभएकाले यसमा गलत अभियोग लागेको दाबी गरे। तत्कालीन समयमा निमित्त सचिव रामकृष्ण सुवेदी भएको र २०७५ मंसिर ३ मा मन्त्रिपरिषद्ले नै भुटानी शरणार्थी समस्या समाधान गर्ने निर्णय गरेकोले उनीहरु सबैलाई अनुसन्धानको दायरामा ल्याउनुपर्नेमा नभएको भन्दै उनले प्रश्न गरे।
‘योनिर्णयको आधारमा कोही तानिएन्,’ उनले भने, ‘यो ठगी थियो भने सुरुवात त्यही निर्णयबाटै भएको थियो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
