काठमाडौं- नेपाल समाजवादी पार्टीले भारतीय संसद् भवनमा राखिएको अखण्ड भारतको नक्सा आपत्तिजनक भन्दै कूटनीतिक पहलबाट हल खोज्न आग्रह गरेको छ। जेठ २५ र २६ मा बसेको पार्टीको केन्द्रीय समितिको बैठकबाट पारित समसायमिक प्रस्तावबारे जानकारी दिँदै आइतबार प्रकाशित विज्ञप्तिमा सरकारले भारत सरकारको ध्यानाकर्षण गराओस् भनिएको छ।
'राष्ट्रिय हितलाई केन्द्रबिन्दुमा राख्दै स्वतन्त्र परराष्ट्र नीति अवलम्बन गर्न तथा सन्तुलित वाह्य सम्बन्ध सञ्चालन गर्न माग गर्दै नेपाल–भारतबीच उत्पन्न सीमा विवाद सम्बन्धमा यथाशीघ्र वार्ता प्रक्रिया सुरु गरी कूटनीतिक तबरबाट हल गर्न सरकारसमक्ष यो बैठक अपिल गर्दछ', निर्णयमा भनिएको छ।
त्यस्तै, शान्ति प्रक्रियाको बाँकी कामका रूपमा रहेको सत्य निरुपण तथा मेलमिलाप आयोग, बेपत्ता छानविन आयोगको कामलाई प्रभावकारी रूपमा अघि बढाउन र यथाशीघ्र सम्पन्न गर्न बैठकले माग गरेको छ।
'द्वन्द्वकालीन मुद्दाहरुलाई उठाएर शान्ति प्रक्रियालाई भाँड्न भइरहेका प्रतिगामी हर्कतहरुको यो बैठक भर्त्सना गर्दछ। साथै रेशम चौधरी लगायत टीकापुर थारु विद्रोहका नेताहरुलाई कानुन बमोजिम सरकारको सिफारिसमा राष्ट्रपतिबाट माफी मिनाहा भएकोमा यो बैठक उक्त निर्णयको स्वागत गर्दछ। मधेश आन्दोलन, जनजाति आन्दोलन, थारु आन्दोलन लगायतका बाँकी बन्दीहरुको शीघ्र रिहाइको माग गर्दछ', निर्णयमा भनिएको छ।
सरकारबाट पेश नागरिकतासम्बन्धी विधेयक राष्ट्रपतिबाट प्रमाणीकरण भइसकेपछि पनि त्यसलाई विफल तुल्याउन विभिन्न षड्यन्त्र भइरहेको सन्दर्भमा बैठकको ध्यानाकर्षण भएको भनिएको छ। नागरिकता सम्बन्धी समस्या समाधान गर्न संविधानको प्रावधान र मर्म बमोजिम सबै नेपाली जनताले सहजरुपमा नागरिकता प्राप्त गर्ने व्यवस्थाका लागि बैठकले सरकारसँग माग गरेको छ।
'प्रदेश १ को नामाकरण सम्बन्धमा पुराना दलहरुले गरेको गलत निर्णयका विरुद्घ आन्दोलनरत पहिचान पक्षधर जनसमुदाय, दल एवं संगठनहरु प्रति हाम्रो पार्टीको पूर्ण ऐक्यबद्धता छ', निर्णयमा भनिएको छ, 'साथै यो बैठक प्रदेशको नामाकरण पहिचानका आधारमा हुनुपर्छ भन्ने मान्यतामा दृढता व्यक्त गर्दछ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
