रौतहट– रौतहटको लालबकैया नदीमा शनिबार डुंगा पल्टिँदा हराइरहेका २१ जनाको अवस्था अझै अज्ञात रहेको छ। डुंगामा सवार अन्य व्यक्ति भने सम्पर्कमा आएको जिल्ला प्रहरी कार्यालय रौतहटका प्रहरी प्रमुख केदार ढकालले जानकारी दिए।
‘माझीहरुका अनुसार ३० जनाभन्दा बढी सवार रहेको बुझिएको छ।’, उनले भने, ‘२१ जनाको अवस्था अझै अज्ञात रहेको छ।’ उनका अनुसार हराइरहेकाहरुको हाल नेपाली सेना, नेपाल प्रहरी तथा सशस्त्र प्रहरीको टोलीले खोजी कार्य जारी राखेको छ।
नदीमा बाढी आएकोले खोजीकार्यमा केही समस्या भएको ढकालले बताए। ‘वर्षातको समय भएको भएर नदीमा पानीको मात्रा र बहाव पनि बढी छ। तर पनि नदीको गहिराई कम भएकोले हालसम्म गोताखोरको आवश्यकता पर्छ भन्ने लागेको छैन।’, उनले भने,‘तीन वटै तहका सुरक्षा अंग खोजीकार्यमा जुटेका छौं।’
प्रहरी प्रमुख ढकालले डुंगा के कारणले पल्टियो भन्ने तथ्य हालसम्म नखुलेको बताए। उनी भन्छन्, ‘नदीमा बाढी पनि आएको र एउटै डुंगामा ३० भन्दा बढी सवार भएको हामीले बुझेका छौं। त्यसकारण धेरै यात्रु सवार हुनु नै प्रमुख कारण हो भनेर अनुमान गर्नसक्छौं।’
प्रहरी प्रमुख ढकालका अनुसार सम्पर्कमा आउनेमा डुंगा चालक इस्नाथ नगरपालिका बन्जाराहाका पप्पु सिंह, गौर–४ का २३ वर्षीय विजय चन्द्रवंशी, ५० वर्षीया सीतादेवी सहनी, ३४ वर्षीया सीमादेवी सहनी र ५२ वर्षीया सीतापति देवी सहनीसहित १५ जना रहेका छन्।
उनीहरू खोला तैरिएर सकुशल प्रहरी सम्पर्कमा आएको रौतहटका प्रहरी प्रमुख ढकालले जानकारी दिए। प्रहरीको टोलीले गौर–४ का जयप्रकाश गिरी, सुखियादेवी सहनी, शिरिभगवान यादव, महेन्द्र सहनी, विश्वनाथ साह, अंगद कश्वान, सन्तोष दास, गजेन्द्र सहनीलाई उद्दार गरेको थियो।
उता राष्ट्रिय आपतकालीन उद्दार केन्द्रले भने १७ जना पुरुष र ५ जना महिला गरी कुल २२ जना सम्पर्कमा आएकाे बताएकाे छ।
बन्जाराहबाट सदरमुकाम गौरको टिकुलियाघाटतर्फ आउँदै गरेको डुंगा लालबकैया नदीमा शनिबार बेलुका पल्टिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1766648928.png)
