१ अर्ब बढी पाउने लोभ गर्दा ओमप्रसादले गुमाए ७२ लाख

सुरक्षा/अपराध

नारायण अधिकारी आइतबार, जेठ ७, २०८० १६:४०

काठमाडौं– फेसबूक म्यासेन्जरमा आएको म्यासेजको विश्वास गर्दा एक नेपाली युवाले ७२ लाख रुपैयाँ भन्दी बढी गुमाएका छन्। केन्द्रीय अनुसन्धान ब्यूरो (सीआईबी)ले गरेको अनुसन्धान अनुसार नेपाली युवा ओमप्रसाद सुवेदीले म्यासेन्जरमा आएको म्यासेज विश्वास गर्दा ७२ लाख रुपैयाँ गुमाएका हुन्।

केही सयमअघि ओमप्रसादलाई फुसन तुमसाभास नामको फेसबूक आईडीबाट फ्रेण्ड रिक्वेस्ट आयो। ओमप्रसादले रिक्वेस्ट असेप्ट गरे। रिक्वेस्ट असेप्ट हुनेबित्तिकै फुसनले आफ्नो परिचय दिँदै भने ‘म टर्किस नागरिक हुँ। बैंकको कर्मचारी हुँ।’

उनले ओमप्रसादलाई विश्वासमा पार्न बैंकको आईडी र पासपोर्टको फोटो समेत पठाए। टर्की आईएसबी बैंकमा कार्यरत रहेको भन्ने परिचय खुल्ने कार्ड पठाएका थिए। ओमप्रसादलाई विश्वासमा पारेपछि फेसबूकमा फुसन नाम गरेका ती व्यक्तिले म्यासेज गरे, ‘एड्रियन सुवेदीको २०२० मार्च २४ मा मृत्यु भएको छ। उनले टर्की आईएसबी बैंकमा राखेको ९५ लाख फिक्स्ड डिपोजिट रकमको हकवालमा तपाईंको नाम उल्लेख गरिएको रहेछ। रकम लिन टर्की आउनुस्।’

विश्वासमा पार्नका लागि एड्रियन सुवेदीको डेर्थ सर्टिफिकेट, फिक्सड डिजोजिट राखेको देखिने प्रमाणपत्र, हकवालामा ओमप्रसादको नामलगायतका विवरणहरु पनि फुसनले ओमप्रसादलाई पठाए।

थप जानकारी लिनका लागि भन्दै एउटा ईमेल आइडीसमेत पठाए। यदी आफैं टर्की आउन नसक्ने भए कानुनी परामर्शका लागि भन्दै टर्कीको वकिललाई सम्पर्क गर्नसक्नुहुन्छ भन्दै वकिलको इमेल आईडीसमेत फुसनले पठाए।

हालको विनिमयदरअनुसार उल्लेखित ९५ लाख डलरको १ अर्ब २४ करोड ४५ लाख नेपाली रुपैयाँ हुन्छ। १ अर्ब रुपैयाँभन्दा बढी पाउने भएपछि ओमप्रसाद पनि लोभिए र फुसनको म्यासेजको विश्वासमा परे।

ओमप्रसादले फुसनले पठाएको ईमेल आइडीमा म्यासेज पठाए। त्यसपछि वकिलले प्रतिनिधिको रुपमा आफूलाई राख्नका लागि मन्जुरीनामा चाहिने भन्दै मन्जुरीनामाको नमूना ओमप्रसादलाई ईमेलमा पठाए। मन्जुरीनामा भरेर ओमप्रसादले वकिलको ईमेलमा फर्वाड गरे।

त्यसपछि सुरु भयो ठगीको औपचारिक खेल। विभिन्न कागजात मिलाउनुपर्ने, डकुमेन्टेसन गर्नुपर्ने, राजस्व तथा कर वापतको रकम बुझाउनु पर्ने, वकिल फि लगायतका शीर्षकमा भन्दै पटक पटक ७२ लाख रुपैयाँ ओमप्रसादलाई हाल्न लगाइयो।

वकिल भनिएका व्यक्तिले पठाएको विभिन्न नेपाली व्यक्तिको बैंक खातामा पटक–पटक गरी ओमप्रसादले ७२ लाख रुपैयाँ हाले। तर फिक्सड डिपोजिटमा राखिएको भनिएको रकम पाउनुको साटो ७२ लाख रुपैयाँ बुझाइसकेपछि फुसन, वकिल भन्ने व्यक्तिहरु सम्पर्कविहीन भए।

त्यसपछि आफू ठगिएको आशंका गर्दै ओमप्रसाद गत चैत ५ गते प्रहरीको केन्द्रीय अनुसन्धान ब्यूरो (सीआईबी) पुगेका थिए। आफूले पैसा डिपोजिट गरेको बैंक स्लिप लिएर सीआईबी पुगेपछि प्रहरीले उक्त रकम बुझ्नेहरुमाथि अनुसन्धान अघि बढाएको थियो। सो क्रममा प्रहरीले ४ जनालाई कम्फर्ट हाउजिङ सोसाइटीबाट पक्राउ गर्‍यो।

पक्राउ पर्नेहरुमा सप्तरीको राजविराज नगरपालिका–४ का महाविर प्रसाद साह, सोही ठाउँका ३० वर्षीय नवीनकुमार चौधरी, कास्कीको माछापुच्छ्रे गाउँपालिका–३ का २९ वर्षीय लक्ष्मण नेपाली र काठमाडौं नागार्जुन नगरपालिका–४ का ३२ वर्षीय सन्तोष तामाङ छन्।

उनीहरुबाट यो ठगी प्रकरणमा मुख्य नाइके पाकिस्तानमा बसेर काम गरेको खुलेको छ। टर्की नागरिक बताउँदै ओमप्रसादलाई म्यासेज गर्ने व्यक्ति पाकिस्तानी नागरिक आदिल भन्ने रहेको पक्राउ परेकाहरुले बयान दिएका छन्।

विगत १० वर्षदेखि राजविराजमा पुस्तक पसल सञ्चालन गर्दै आएका महावीरलाई आफू पाकिस्तानी नागरिक आदिल बताउनेले फेसबूकमा साथी बनाउँदै कुरा गर्न थालेका थिए। त्यसपछि उनीहरुको ह्वाट्एप नम्बरसमेत आदानप्रदान भएको थियो। ‘आदिलले नेपालमा काम छ बैंकको खाताहरु मलाई चाहिएको छ। खाता खोली कनेक्ट आईपीएससमेतको मोबाइल बैंकिङ सेवा सञ्चालन गरी मलाई दिए वापत रकम दिन्छु’ भनेपछि आफू काठमाडौंमा आएर काम गरेको महावीरले बयान दिएका छन्।

आदिलले हुण्डीको कारोबार गर्नका लागि बैंक खाता चाहिएको बताएका थिए। पछि महावीरले नै उपलब्ध गराएको विभिन्न व्यक्तिको बैंक खातामा ओमप्रसादलाई रकम जम्मा गर्न लगाएर ठगी गरेको पाइएको सीआईबीले जनाएको छ।

आदिल भन्ने व्यक्तिकै योजनाअुनसार काठमाडौं आएर महावीरसहितका व्यक्तिले मासिक ७० हजारमा अपार्टमेन्टमा भाडा तिर्दै बस्दै आएको खुलेको छ। महावीरले उलपब्ध गराएको बैंक खातामा ओमप्रसादले रकम जम्मा गरेपछि हुण्डीमार्फत् उक्त रकम विदेश पठाउने गरेको पाइएको प्रहरीले जनाएको छ।

ओमप्रसादले विभिन्न ९ जना व्यक्तिको नाममा ७२ लाख ९० हजार ४२५ रुपैयाँ डिपोजिट गरेका थिए। उनीहरुसहितका व्यक्तिलाई प्रतिवादी बनाइएको छ।

माथि उल्लेख गरिएका ४ जना बाहेक धनुषाको मिचिलाविहारी नगरपालिका–३ का ३६ वर्षीय मिथुन मण्डल खत्वे, कैलालीको गौरीगंगा नगरपालिका–१ का २३ वर्षीय दिनेश चौधरी, कञ्चनपुरको लालझाडी गाउँपालिका–१ की २६ वर्षीया रेश्मा कुमारी राना, सिन्धुपाल्चोकको चौतारा साँगाचोकगढी–१ की २० वर्षीया अञ्जु थापा, कैलालीको गौरीगंगा नगरपालिका–१ का २३ वर्षीय अशोक चौधरी, धनुषाको मिथिला नगरपालिका–४ का २७ वर्षीय हरिशचन्द्र सिंह, काभ्रेको पनौती नगरपालिका–१ का ४३ वर्षीय दीपक सापकोटा र कैलालीको गौरीगंगा नगरपालिका–१ का २३ वर्षीय हिमाल आचार्यलाई फरार प्रतिवादी बनाएर जिल्ला अदालत काठमाडौंमा मुद्दा दायर गरिएको छ।

उनीहरुविरुद्ध जेठ ५ गते मुद्दा दायर गरिएको हो। पक्राउ परेकाहरुको मोबाइलबाट क्रिप्टोकरेन्सीको कारोबार हुने गरेको समेत प्रमाणहरु भेटिएकाले ठगी र राष्ट्र बैंक अन्तर्गतको कसुरमा मुद्दा दर्ता गरिएको जिल्ला सरकारी वकिल कार्यालयले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।