काठमाडौं– काठमाडौंको चावहिलस्थित ॐ हस्पिटल एण्ड रिसर्च सेन्टर प्रालिले सिन्धुपाल्चोकको बाह्रविसेमा एकदिने बृहत निःशुल्क स्वास्थ्य परीक्षण शिविर सम्पन्न गरेको छ।
‘बाहबिसे प्राथमिक स्वास्थ्य केन्द्र ईसीसीकर’ अस्पतालको आफ्नो संस्थागत सामाजिक उत्तरदायित्व अन्तर्गत ॐ हस्पिटल र हरिमाया बाह्रविसे फाउण्डेशनको संयुक्त आयोजनामा बाह्रविसे प्राथमिक स्वास्थ्य सेवा केन्द्रमा सञ्चालित शिविरमा बाह्रविसे नगरपालिकालेसमेत सहकार्य गरेको थियो।
शिविरको उद्घाटन स्वास्थ्य तथा जनसंख्या मन्त्री मोहनबहादुर बस्नेतले गरेका थिए। उक्त शिविरमा स्वास्थ्य परीक्षण गर्न आउने सम्पूर्ण सेवाग्राहीहरुलाई निःशुल्क स्वास्थ्य परीक्षण, उपचार तथा निःशुल्क औषधि उपलब्ध गराइएको थियो।
बाह्रविसे वरपरका ग्रामीण समुदायका स्थानीयलाई विशेषज्ञ चिकित्सकहरुद्वारा उपचार सेवा उपलब्ध गराउने उद्देश्यले ॐ अस्पतालले रेडियोलोजी, सामान्य चिकित्सा, जनरल सर्जरी, स्त्री तथा प्रशुतीरोग, मुटुरोग, छाति तथा स्वासप्रस्वास रोग, दन्तरोग, हाडजोर्नी, चर्म तथा यौनरोग, नाक कान घाँटी, स्त्री क्यान्सर परीक्षण, मनोरोग तथा फार्मेसी सेवा लगायतका विषयहरुमा ३० जना भन्दा बढी विशेषज्ञ चिकित्सकसहित शिविर सञ्चालन गरेको हो।
ॐ हस्पिटल सञ्चालक समितिका अध्यक्षसमेत रहेका सिनियर कन्सल्ट्यान्ट रेडियोलोजिष्ट डा आनन्द प्रसाद श्रेष्ठको नेतृत्वमा भएको स्वास्थ्य परीक्षण शिविरमा वरिष्ठ चिकित्सकहरु द्वारा स्वास्थ्य परीक्षण गरिनुका साथै अन्य अत्यावश्यकीय परीक्षण र परामर्श गर्न सकिने व्यवस्था मिलाइएको र थप उपचारका लागि काठमाडौं स्थित ॐ हस्पिटलमा विशेष छुटसमेत प्रदान गरिने व्यवस्था गरिएको छ।
अध्यक्ष डा श्रेष्ठले सम्बोधनका क्रममा आफ्नो चिकित्सकीय सेवाको सुरुवाती दिनहरुको सम्झना गर्दै बाह्रबिसे आफ्नो दोश्रो घर सरह रहेको बताए। बाह्रविसेका स्थानीयहरु परिवारका सदस्यहरु जस्तै लाग्ने र आफू त्यस समुदायका लागि हरसम्भव सहयोग गर्न सदा तत्पर रहेको बताए।
शिविरको उद्घाटन सम्बोधनका क्रममा स्वास्थ्य तथा जनसंख्या मन्त्रीले स्वास्थ्य सेवा केन्द्रमा तत्काल आवश्यक उपकरणहरु उपलब्ध गराउने र निकट भविष्यमा केन्द्रलाई १० देखि १५ शय्याको अस्पतालमा स्तरोन्नति गर्ने प्रतिबद्धता व्यक्त गरे।
यस्तै बाग्मती प्रदेश सभा सांसद मसिना खड्काले प्रदेशका तर्फबाट बाह्रविसेका जनताको स्वास्थ्य उपचार सेवाको स्तर वृद्धिका लागि सहयोग रहने बताइन्।
बाह्रविसे नगरपालिकाका नगर प्रमुख बालकृष्ण बस्नेतले सो स्वास्थ्य सेवा केन्द्रको उपचार सेवा विस्तार र स्तरोन्नतिका लागि नगरपालिकाको तर्फबाट पूर्ण सहयोग गर्ने प्रतिबद्धता व्यक्त गरे।
हरिमाया बाह्रबिसे फाउण्डेशनका अध्यक्ष नरेश लाल श्रेष्ठले आमाको सम्झनामा स्थापना गरिएको फाउण्डेसनले स्थानीय र वरपरका जनमानसको सेवाका लागि आयोजित स्वास्थ्य शिविरमा साथ दिएकोमा ॐ हस्पिटल परिवार र अस्पतालका अध्यक्ष डा आननन्द प्रसाद श्रेष्ठलाई विशेष धन्यवाद दिए।
ॐ हस्पिटलका प्रमुख कार्यकारी अधिकृत यम बहादुर महतले आफ्नो स्थापना कालदेखि नै संस्थागत सामाजिक उत्तरदायित्व अन्तर्गत देशका विभिन्न भागमा स्वास्थ्य शिविर सञ्चालन गर्दै आएको र आगामी दिनहरुमा पनि स्वास्थ्य सेवामा सहज पहुँच नभएका समुदाय लक्षित निःशुल्क स्वास्थ्य शिविर लगायतका विभिन्न सचेतनामूलक कार्यक्रमहरु समेत सञ्चालन गर्दै जाने योजना रहेको जानकारी गराए।
शिविरमा चर्म तथा यौन रोगमा १०१ जना, मनोरोगमा ५० जना , इ.सि.जी.मा ३९ जना, हाडजोर्नीमा २५० जना, दन्त चिकित्सा सेवामा १६० जना, सामान्य चिकित्सा, कलेजो तथा पेटरोग, छाती तथा फोक्सो र नाक कान घाँटी तथा मुटुरोगमा १०० जना, अल्ट्रासाउण्डमा १६० जना, एक्स रे सेवामा १६० जना स्त्री तथा प्रसुतीमा १८६ जना र स्त्री क्यान्सर परीक्षणमा ५० जना, बालरोग तथा शल्यक्रिया सम्बन्धी २९ जना सहित विभिन्न विधामा एक हजार भन्दा बढी बिरामीले विशेषज्ञहरुसँग परामर्श तथा उपचार सेवा प्राप्त गरेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
