काठमाडौं- नेपाली कांग्रेसका सांसद दीपक गिरीले कांग्रेसकै सांसद सञ्जय गौतमले सुरु गरेको अनसनबाट सरकारको आँखा खोलोस् भन्ने आग्रह गरेका छन्। सोमबारको प्रतिनिधि सभा बैठकको आकस्मिक समयमा सम्बोधन गर्दै उनले यस्तो विषयमा संवेदनशील हुनुपर्ने बताए।
विभिन्न १५ बुँदे माग प्रस्तुत गर्दै सांसद गौतमले वैशाख ३० गतेबाट अनसन सुरु गरेका थिए। कांग्रेसका केन्द्रीय सदस्य तथा पूर्वसिचाइँमन्त्री समेत रहेका गौतमले बबई नदीको जब्दीघाटमा भासिएको पुलमुनि अनसन सुरु गरेका छन्।
उनले 'जब्दीघाटको भत्किएको पुलको स्पान लगायतका संरचना हटाइ तुरुन्त नयाँ पुल निर्माण गर', 'जिल्ला सदरमुकाम पूर्ण जोखिममा छ, तटबन्धको बाँकी काम तुरुन्त नियमित गर' लगायतका माग राखेका छन्। सोही विषयलाई सांसद गिरीले सदनमा उठाएका हुन्।
'यो सदनमा पटकपटक कुरा राख्दा पनि यो सरकारले वास्ता नगरेर जब्दी पुलमुनि आमरण अनसन १५ सुत्रीय माग राखेर आमरण अनसन बसेका छन्', उनले भने।
मुलुकमा धेरै चिजहरु समयमा नबनेको उनको भनाइ छ। 'नगरकोटको बाटो बन्दैन, जब्दी पुल पप्पु यादव भन्नेले बनाएको, त्यो सात वर्ष भयो। बन्दैन। उदयपुरको त्रियुगा पुल बन्दैन। संखुवासभाको अरुण पुल बन्दैन। दाङकै पुल बन्दैन। चार लेन बाटो बन्दैन', उनले भने।
गिरीले अब अनसनको सुरुवात भएको बताए। 'तीन दिन भयो गौतम अनसन बसेको। भोलि हामी सुन्नु नपरोस्, नारायण खड्का त्रियुगाको पुलमुनि बस्नुभएको छ भनेर। पछि दीपक खड्का अरुणको पुलमुनि बस्नुभएको छ भनेर सुन्नु नपरोस्', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
