काठमाडौं- नेपाली कांग्रेसकी नेतृ तथा प्रतिनिधि सभाकी समानुपाति सांसद मन्जु खाण अहिले सम्पर्कविहीन छिन्। विगत केही दिनदेखि मोबाइल स्वीच अफ गरेर उनी सम्पर्कविहीन भएकी छिन्।
नेपाली नागरिकलाई भुटानी शरणार्थी बनाएर अमेरिका पठाउने भन्दै एक अर्ब रुपैयाँभन्दा बढी ठगी गरिएको प्रकरणमा मन्जु पनि संलग्न भएको आशंका गरिएको छ।
प्रहरीले यो ठगी प्रकरणमा संलग्नहरुको खोजी तीव्र पारेपछि यसमा संलग्नहरु धमाधम फरार हुन थालेका छन्। यही प्रकरणमा संलग्न भएको आरोपमा मन्जुका श्रीमान् तथा पूर्व गृहमन्त्री समेत रहेका नेपाली कांग्रेसका प्रभावशाली नेता बालकृष्ण खाण पक्राउ परेका छन्।
बुधबार चाबहिलको मैजुबहालबाट खाण पक्राउ पर्दा उनकी पत्नी मन्जु भने त्यहाँ थिइनन्। प्रहरी स्रोतका अनुसार प्राय मन्जु भने ललितपुरमा बस्थिन् भने बालकृष्ण मैजुबहालमा बस्दै आएका थिए।
प्रहरीको टोली बुधबार बिहान बालकृष्णलाई पक्राउ गर्न घरपुग्दा समेत एकैछिन है फोन गर्छु भन्दै उनले फोन गरेका थियो। त्यतिबेला उनले मन्जुलाई नै भिडिओ कल गरेको आशंका गरिएको थियो।
तर, अहिलेसम्म मन्जुको अवस्थाबारे अन्योल नै रहेको छ। श्रीमान् प्रहरी हिरासतमा भएको दुई दिन बितिसक्दा समेत मन्जु भेट्न नआएपछि उनी कहाँ छिन् भन्ने चासो बढेको छ।
बालकृष्णलाई भेट्न पार्टीका नेतादेखि घरपरिवारका अन्य सदस्यहरु जिल्ला प्रहरी परिसर टेकु पुग्दा श्रीमती मन्जु भने सम्पर्कविहीन हुनुले यो घटनामा मन्जुको पनि संलग्नता हुन सक्ने आशंका गरिएको छ। यसरी सम्पर्कविहीन भएकी मन्जु भने अहिले अष्ट्रेलिया पुगेको हुन सक्ने आशंका गरिएको छ।
विश्वस्त स्रोतका अनुसार खाण पक्राउ पर्दा मन्जु दिल्ली पुगेकी थिइन्। त्यहाँबाट उनी अष्ट्रेलिया पुगेको हुन सक्ने आशंका गरिएको छ। नेपाल हुँदा तथा भारतमै रहँदा समेत पक्राउ पर्न सक्ने भएकाले मन्जु दिल्लीबाट अष्ट्रेलिया गएको हुन सक्ने आशंका गरिएको छ। विश्वस्त स्रोतले नेपाल लाइभलाई दिएको जानकारी अनुसार पनि उनी अष्ट्रेलिया गएको दाबी गरिएको छ। यद्यपि, यसबारे पुष्टि भने भइसकेको छैन।
सचिव टेकनारायण पाण्डे पक्राउ परेपछि उनको मोबाइलको म्यासेजको आधारमा बालकृष्ण पक्राउ परेका थिए। श्रीमान् बालकृष्ण पक्राउ परेपछि उनको मोबाइलको म्यासेजको आधारमा मन्जु सहितका व्यक्ति पनि यो प्रकरणमा तानिन सक्ने आशंका गरिएको छ।
पक्राउ परेका बालकृष्णले आफ्नो मोबाइल फर्म्याट गरेको पाइएपछि प्रहरीले जाँचका लागि डीएफएल (डीजीटील फरेन्सीक ल्याब) मा पठाएको छ। डीएफएलबाट डेटाहरु रिकभर भएपछि त्यसबाट थप तथ्यहरु तथा नेक्कस पत्ता लाग्न सक्न सक्छ। बालकृष्णको मोबाइलबाट मन्जुविरुद्ध थप प्रमाणहरु भेटिएको अवस्थामा उनी समेत अनुसन्धानको दायरामा तानिने छिन्।
यो प्रकरणमा खाणसहित अहिलेसम्म १२ जना पक्राउ परेका छन्। पक्राउ पूर्जी जारी भएका केही व्यक्तिहरु भने फरार छन्। आशंका गरिएका केही व्यक्तिहरुमाथि प्रहरीले प्रमाण जुटाउने काम गरिरहेको छ।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने सदस्य थिए।
तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसवापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको थियो।
तीमध्ये केही नक्कली भुटानी भुटानी शरणार्थी थिए। पछि बालकृष्ण खाण गृहमन्त्री भएपछि त्यो प्रतिवेदन समेत कीर्ते गरेर अनसूची थप्दै थप व्यक्तिहरुको नाम राखिएको पाइएको प्रहरीले जनाएको छ।
नक्कली शरणार्थी बनाएर मोटो रकम असुल्ने योजनामा इन्द्रजित राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरूले बताएका थिए।
नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदनपछि अहिले पक्राउ परेको गिरोहको हातमा पुगेको थियो। उनीहरूले त्यही प्रतिवेदनमा ४४६ जना नेपाली नागरिकको नाम समेट्दै उनीहरूलाई अमेरिका लैजाने भनेर रकम उठाउने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
