काठमाडौं- नेपाल ल क्याम्पसले अभिमुखीकरण कार्यक्रमको नाममा सीमित व्यक्तिहरुलाई धुलिखेल लगेर बजेट दुरुपयोग गरेको पाइएको छ। त्रिभुवन विश्वविद्यालय कानुन संकाय र नेपाल ल क्याम्पसद्वारा काभ्रेको धुलिखेलमा आयोजित कानुनी शिक्षा अध्यापन, पाठ्यक्रम मूल्यांकन, परीक्षा पद्धति र शैक्षिक क्यालेण्डरसम्बन्धी दुई दिवसीय राष्ट्रिय वृहत अभिमुखीकरण कार्यक्रममा केही सीमित व्यक्तिलाई सहभागी गराएर बजेट दुरुपयोग गरेको आरोप छ।
नेपाल ल क्याम्पसका एक शिक्षकले नेपाल लाइभसँग भने, ‘सबै शिक्षकको लागि हुनुपर्ने ओरेन्टेसन कार्यक्रममा केही सीमित व्यक्तिलाई मात्रै सहभागी गराइयो। नेपाल ल क्याम्पस प्रमुखले बुटवल र धरान लगायतका कानुन पढाइ हुने क्याम्पसका आफ्ना शिक्षक साथीलाई बोलाएर धुलिखेल लगे। यसबाट क्याम्पस कोषको दुरुपयोग भएको देखिन्छ।’
नेपाल ल क्याम्पसले कार्यक्रममा नाममा सम्बन्धित विषयका शिक्षकहरुलाई सहभागी नगराइएको उनको आरोप छ। क्याम्पसको बजेटमा घुमफिर र मोजमस्ती गरेर पढाइको गुणस्तर नबढ्ने ती शिक्षकको भनाइ छ।
नेपाल ल क्याम्पस नेविसंघका कार्यबाहक अध्यक्ष मुकेश सेन्चुरीले बीएएलएलबीको कोर्षलाई कसरी अगाडि लिएर जाने, प्रश्नपत्र कसरी विश्वसनीय बनाउने र शैक्षिक क्यालेण्डर कसरी बनाउने भन्ने विषयमा धुलिखेलमा दुई दिनको कार्यक्रम राखेको तर उक्त कार्यक्रममा सीमित कर्मचारीलाई लगेर बजेट सक्ने काम भएको आरोप लगाए।
सेन्चुरीले भने, ‘क्याम्पसको कार्यक्रममा करारका कर्मचारीहरु सहभागी गराइयो। तर अंग्रेजी, अर्थशास्त्र, इतिहास, राजनीतिकशास्त्रका शिक्षकहरुलाई सहभागी गराइएन,’ उनले भने, ‘ल क्याम्पसको खर्च गरेर कार्यक्रम गर्दा विद्यार्थीसँग छलफल भएन। स्ववियुलाई समेत समावेश गराइएन।’
उनले नेपाल ल क्याम्पसमा खानेपानीको अभाव भएको, बीएएलएलबीको शुल्क तिर्न नसकेर केही विद्यार्थीहरुले क्याम्पस छोड्दा समेत क्याम्पसले ध्यान नदिएको आरोप लगाए।
तर, नेपाल ल क्याम्पस प्रमुख डा डीएन पराजुलीले उक्त आरोपको बचाउ गरेका छन्। उनले भने, ‘कानुन संकाय डीनको कार्यालय र नेपाल ल क्याम्पसको आयोजनामा गरिएको कार्यक्रम हो। त्यो कानुन पठनपाठन हुने धरान, राजविराज, पोखरा, नेपालगञ्ज, बुटवलका शिक्षकहरु, नेपाल ल क्याम्पसका शिक्षकहरु र कर्मचारीहरुको अभिमुखीकरण कार्यक्रम हो। प्रश्नपत्र निर्माण, उत्तरपुस्तिकाको मूल्याङ्कनका सन्दर्भमा अभिमुखीकरण थियो,’ उनले भने। केही कर्मचारीहरुको छुट्टै कार्यक्रम रहेको उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
